Një granatë tanku e ushtrisë izraelite vrau 11 anëtarë të familjes Abu Shaaban në qytetin e Gazës, duke shënuar shkeljen më të rëndë të armëpushimit tetëditor me Hamasin.
Një sulm i ushtrisë izraelite ndaj një automjeti civil në lagjen Zeitoun të qytetit të Gazës ka tronditur opinionin publik, pasi në të humbën jetën 11 palestinezë nga e njëjta familje. Ngjarja ndodhi të premten në mbrëmje, kur një granatë tanku goditi makinën ku ndodhej familja Abu Shaaban.
Sipas autoriteteve të mbrojtjes civile në Gaza, viktimat përfshijnë shtatë fëmijë dhe tre gra, të cilët po ktheheshin në shtëpinë e tyre për të parë dëmet pas bombardimeve. Zëdhënësi i mbrojtjes civile, Mahmoud Basal, deklaroi se ushtria izraelite mund të kishte shmangur tragjedinë. “Ata mund të ishin paralajmëruar ose trajtuar ndryshe. Ky akt tregon se pushtimi vazhdon të jetë i etur për gjak,” u shpreh Basal.
Hamas e ka cilësuar ngjarjen si një “masakër të qëllimshme” dhe ka kërkuar ndërhyrjen e menjëhershme të Presidentit amerikan Donald Trump dhe ndërmjetësve ndërkombëtarë për t’i kërkuar Izraelit respektimin e marrëveshjes së armëpushimit.
Raportet nga terreni tregojnë se ushtarët izraelitë hapën zjarr ndaj civilëve që kaluan të ashtuquajturën “vijë e verdhë”, një kufi i përkohshëm që përcakton tërheqjen e trupave izraelite sipas kushteve të armëpushimit.
Gazetarja e Al Jazeera, Hind Khoudary, raportoi se shumë palestinezë nuk kanë akses në internet dhe nuk dinë ku ndodhen linjat izraelite, gjë që i ekspozon familjet ndaj rrezikut të vazhdueshëm. Ajo shtoi se aktualisht Izraeli mban nën kontroll rreth 53 për qind të territorit të Gazës.
Ndërkohë, ndërsa vazhdon shkëmbimi i pengjeve izraelite me të burgosur palestinezë, ushtria izraelite ka vrarë të paktën 28 palestinezë që nga nisja e armëpushimit dhe ka kufizuar ashpër hyrjen e ndihmave humanitare. Ushqimet, uji dhe ndihmat mjekësore po mbërrijnë me vonesë, ndërsa situata humanitare po përkeqësohet çdo ditë.
Kombet e Bashkuara paralajmëruan këtë javë se konvojet e ndihmave po përballen me vështirësi ekstreme për të arritur në zonat më të goditura nga uria. Sipas të dhënave, gati gjysma e popullsisë së Gazës ka më pak se gjashtë litra ujë të pijshëm në ditë, shumë poshtë standardeve të emergjencës.
Programi Botëror i Ushqimit raportoi se që nga nisja e armëpushimit po dërgon mesatarisht vetëm 560 tonë ushqime në ditë në Gaza, shumë më pak se nevoja minimale për të parandaluar urinë masive.
Pavarësisht situatës dramatike, Hamas ka deklaruar se mbetet i përkushtuar ndaj kushteve të armëpushimit, përfshirë dorëzimin e trupave të robërve izraelitë të mbetur nën rrënoja. Të premten, grupi dorëzoi një tjetër trup, duke e çuar numrin total në dhjetë që prej nisjes së marrëveshjes.
Gazetari Hani Mahmoud nga Gaza tha se ndalimi nga Izraeli i futjes së makinerive të rënda po pengon ekipet e kërkimit në nxjerrjen e trupave nën rrënoja. “Populli i Gazës ka përvojë dhe aftësi për të kërkuar trupat, por pa pajisje të specializuara kjo bëhet pothuajse e pamundur,” tha ai.
