Një gjykatë në Serbi ka dënuar prindërit e një të riu, i cili vitin e kaluar kreu një nga masakrat më të rënda në historinë e vendit, duke vrarë nëntë nxënës dhe një roje shkolle në një shkollë fillore në qendër të Beogradit.
Ngjarja, e cila ndodhi më 3 maj 2023, tronditi opinionin publik dhe solli reagime të forta në nivel kombëtar.
Gjykata e Lartë në Beograd dënoi Vladimir Kecmanoviçin, babanë e sulmuesit, me 14 vjet e gjashtë muaj heqje lirie për “vepra të rënda kundër sigurisë publike” dhe “lënie pas dore të fëmijës”. Ndërkohë, nëna, Miljana Kecmanoviç, u dënua me tre vjet burg për “lënie pas dore të fëmijës”, por u lirua nga akuzat për armëmbajtje pa leje.
Sulmuesi, Kosta Kecmanoviç, ishte vetëm 13 vjeç në momentin e krimit, çka e përjashtoi atë nga përballja me drejtësinë, sipas ligjeve serbe. Pas ngjarjes, prindërit e tij u arrestuan menjëherë, pasi autoritetet deklaruan se nuk kishin marrë masat e duhura për të mbajtur armët jashtë mundësive të djalit të tyre.
Masakra në shkollën fillore “Vladislav Ribnikar” shënoi një precedent të tmerrshëm për vendin, i cili më parë nuk kishte përjetuar sulme të tilla në institucionet arsimore. Sulmuesi përdori armët e të atit për të hapur zjarr ndaj shokëve të tij dhe stafit të shkollës, duke shkaktuar një tragjedi të rëndë.
Avokatja e prindërve, Irina Boroviç, deklaroi se vendimi nuk ishte i papritur, duke theksuar presionin e madh publik mbi gjykatën. Ajo njoftoi se do ta apelojë vendimin. Ndërkohë, Ninela Radiçeviç, e cila humbi vajzën e saj në këtë ngjarje, shprehu zhgënjim të thellë për mungesën e një përgjegjësie më të gjerë për humbjen e jetëve.
Ngjarja u përshkallëzua me një tjetër tragjedi vetëm një ditë më pas, kur një 21-vjeçar, Uros Blazhiç, hapi zjarr në disa fshatra pranë kryeqytetit, duke vrarë nëntë persona dhe plagosur 12 të tjerë. Ai u dënua më herët këtë muaj me 20 vjet burg.
Të dyja ngjarjet tronditën Serbinë, duke çuar në protesta masive dhe një operacion të gjerë kundër armëmbajtjes pa leje. Policia dhe autoritetet deklaruan se do të ndërmarrin masa më të ashpra për të parandaluar incidente të ngjashme në të ardhmen. Ndërkohë, rasti mbetet një pikë diskutimi e thellë për përgjegjësinë prindërore dhe masat e sigurisë publike.
