Kryetari i PSD, Tom Doshi, zhvillon një komunikim të drejtpërdrejtë me emigrantët shqiptarë, duke prezantuar programin social dhe synimet politike të partisë për Kukësin.
Tom Doshi, kryetar i Partisë Social Demokrate (PSD), zhvilloi një komunikim të drejtpërdrejtë me emigrantët shqiptarë që jetojnë në Britaninë e Madhe përmes Skype, ku u njoftoi për programin dhe synimet politike të PSD-së për zgjedhjet e ardhshme. Gjatë bisedës, Doshi theksoi rëndësinë e mbështetjes së diasporës dhe kërkoi që shqiptarët e Britanisë të bashkohen për të ndihmuar partinë dhe kandidatët e saj në Kukës, Has dhe Tropojë.
“Jam shumë i lumtur dhe kam shumë shpresë për mbështetjen që po jepni ju për PSD-në dhe kandidatët tanë. Kam një lidhje të fortë me ju dhe jam i emocionuar për mbështetjen që po merr programi ynë,” tha Doshi, duke shtuar se partia e tij ka një program social të orientuar për përmirësimin e kushteve të jetesës për qytetarët. Ai theksoi se për PSD-në, prioritet janë politikat sociale dhe krijimi i mundësive më të mira për emigrantët dhe ata që jetojnë në Shqipëri.
Doshi shpjegoi gjithashtu se partia e tij po përgatit një program që ka një strukturë të ngjashme me një buxhet të shtetit, duke u fokusuar në trajtimin e problemeve të emigrantëve siç janë ndihmat sociale, ilaçet dhe pensionet. “Politika duhet të jetë për njerëzit, dhe ne do të sigurojmë që ky program të shërbejë çdo qytetari,” shtoi ai.
Ai gjithashtu theksoi se për herë të gjashtë ai ka vendosur të kandidojë në qytetin e tij, Kukës, dhe çdo herë ka marrë mbështetje të madhe nga qytetarët. Doshi premtoi se do të vazhdojë të punojë për të përmirësuar jetesën e qytetarëve të Kukësit, Hasit dhe Tropojës, duke u siguruar që të gjitha kërkesat e tyre të meritojnë një përgjigje.
Kandidatët për deputetë të PSD-së në Qarkun Kukës, Suad Bokçiu dhe Violeta Imeraj, shprehën gjithashtu mbështetjen e tyre për programin e PSD-së dhe theksuan angazhimin e tyre për të siguruar një të ardhme më të mirë për qytetarët e këtyre tre qarqeve. Bokçiu, i cili është kandidat për deputet në Kukës, tha se është kthyer nga diaspora për të kontribuar për përmirësimin e vendit të tij, duke shtuar: “Unë kam studiuar atje dhe dua të bëj diçka të mirë për këtë vend.”
Nga ana tjetër, Violeta Imeraj, gjithashtu kandidate për deputetë nga Kukësi, nënvizoi rëndësinë e bashkimit të forcave mes emigrantëve dhe atyre që jetojnë në Shqipëri. “Mes jush kam edhe djalin tim aty, dhe kërkoj që të na votoni të gjithëve, sepse do të jemi zëri i juaj dhe do të punojmë për ju,” theksoi Imeraj.
Gjatë këtij komunikimi, emigrantët shqiptarë shprehën mbështetje të plotë për PSD-në, duke besuar se kjo parti ka mundësinë të sigurojë të paktën një mandat në Kukës në zgjedhjet e 11 Majit. Partia Social Demokrate ka synim që të fuqizojë mbështetjen e saj dhe të sigurojë një pozicion të fortë në këtë qark të rëndësishëm për Shqipërinë.
