Banorë të zonës ku po ndërtohen parqe fotovoltaike denoncojnë grabitjen e tokave të tyre bujqësore, ndërsa punimet vijojnë pa u bllokuar nga Prokuroria e Fierit, pavarësisht ankesave dhe dokumenteve që ata pretendojnë se provojnë pronësinë ligjore.
Sipas banorëve, në këtë proces janë të përfshira struktura të Bashkia Fier, si edhe djem politikanësh të lartë të Partia Socialiste, çka, sipas tyre, ka garantuar mbrojtje politike për vijimin e punimeve dhe heshtje institucionale.
Fermerët shprehen se tokat u janë marrë pa pëlqim, ndërkohë që investimet fotovoltaike po zhvillohen mbi prona që ata i disponojnë me dokumentacion të rregullt. Mosreagimi i Prokurorisë për të pezulluar punimet ka rritur tensionin në komunitet dhe ka shtuar dyshimet për një skemë të mirëorganizuar tjetërsimi pronash.
Përballë kësaj situate, banorët i janë drejtuar me apel SPAK, duke kërkuar hetim të pavarur dhe ndërhyrje urgjente për ndalimin e punimeve, verifikimin e dokumentacionit të pronësisë dhe vënien para përgjegjësisë të çdo zyrtari apo individi të përfshirë.
“Ne nuk po kërkojmë favore, por drejtësi. Tokat janë jeta jonë dhe nuk mund të na merren me vendime në letër dhe me mbrojtje politike,” shprehen banorët, duke paralajmëruar se do të vijojnë betejën ligjore dhe protestat deri në zbardhjen e plotë të çështjes.
