Një 22 vjeçar është arrestuar në Tiranë pasi dyshohet se gjatë gjashtë muajve të fundit ka vjedhur disa biçikleta dhe monopatina në kryeqytet, të cilat më pas i shiste në zona të ndryshme të qytetit.
Sipas informacioneve zyrtare në pranga ka rënë shtetasi E P., 22 vjeç, i cili dyshohet se është autor i gjashtë vjedhjeve të biçikletave, një monopatine dhe një dyqani. Ai rezulton i dënuar më parë për të njëjtën veprimtari.
Hetimet e kryera nga Komisariati i Policisë numër katër në bashkëpunim me Komisariatin numër dy kanë bërë të mundur identifikimin dhe arrestimin e të dyshuarit. Nga veprimet hetimore dyshohet se vjedhjet janë kryer në periudhën maj nëntor dhe mjetet e vjedhura janë shitur në pjesë të ndryshme të Tiranës.
Policia vijon punën për dokumentimin e rasteve të tjera të mundshme. Materialet janë dërguar në Prokurori për veprime të mëtejshme.
