Bashkëorganizimi i Kampionatit Europian të Futbollit U21 në vitin 2027 nga Shqipëria dhe Serbia ka shkaktuar reagime të forta nga Tifozët Kuqezi, të cilët shprehën qëndrimin e tyre në mënyrë simbolike gjatë ndeshjes ndaj Ukrainës në “Arenën Kombëtare”.
Me pankarta dhe mesazhe të fuqishme, tifozët i bënë thirrje Federatës Shqiptare të Futbollit (FSHF) të tërhiqet nga kjo nismë, të cilën ata e konsiderojnë si të papranueshme për shkak të ngjarjeve të dhimbshme të së kaluarës.
Në mesazhin e tyre, Tifozët Kuqezi nënvizuan plagët ende të hapura që lidhen me luftën në Kosovë dhe historinë e dhunshme mes shqiptarëve dhe serbëve. Ata kujtuan masakrat, dëbimet dhe tragjeditë e pafundme që kanë lënë gjurmë të pashlyeshme në kujtesën kombëtare. Për këtë arsye, tifozët e shohin çdo bashkëpunim të tillë si një fyerje ndaj viktimave dhe sakrificave të popullit shqiptar.
Në pankartat e shfaqura gjatë ndeshjes, tifozët sollën në vëmendje faktet historike të dhimbshme, duke përmendur: 15 mijë të vrarë gjatë luftës së fundit, 20 mijë gra të dhunuara, 1 milion shqiptarë të dëbuar nga shtëpitë e tyre, 650 shkolla të shkatërruara dhe 30 masakra të kryera mbi civilë të pambrojtur në një periudhë prej më pak se gjashtë muajsh.
Tifozët theksuan gjithashtu ngjarjet e turpshme, si thirrjet anti-shqiptare në stadiumin serb më 14 tetor 2014, gjatë incidentit me dronin, ku një stadium i tërë brohoriste për vrasjen e shqiptarëve. Ata përmendën edhe viktimat më të fundit, si Afrim Bunjakun dhe Përparim Thaçin, duke theksuar se plagët e luftës ende nuk janë shëruar.
Për tifozët, bashkëorganizimi i këtij kampionati me Serbinë përfaqëson tradhti ndaj historisë dhe sakrificave kombëtare. Ata kritikuan ashpër FSHF-në për mbështetjen e kësaj nisme, duke e quajtur atë një “marrëzi në emër të kozmopolitizmit” që fyen viktimat dhe dhimbjen e shqiptarëve.
Mesazhi i tyre ishte i qartë: reagimet nuk do të ndalen. Tifozët paralajmëruan se protestat do të vazhdojnë dhe mund të radikalizohen deri në ndërprerjen e këtij projekti. Ata u bënë thirrje institucioneve dhe publikut të ndërgjegjësohen për rëndësinë e respektimit të historisë dhe dinjitetit kombëtar.
Reagimet e Tifozëve Kuqezi nuk janë vetëm një formë proteste sportive, por një kërkesë për drejtësi dhe respekt për të kaluarën, që për ta është një pjesë e pandashme e identitetit kombëtar.
