Tifogrupi “Plisat” ka dërguar një mesazh emocionues për lojtarët e Kombëtares Shqiptare, duke i bërë thirrje të luftojnë me zemër për historinë dhe krenarinë kombëtare në sfidën ndaj Serbisë.
Shqipëria po përgatitet për një nga ndeshjet më të rëndësishme të viteve të fundit, përballjen ndaj Serbisë më 11 tetor në Leskovac. Kjo sfidë, e mbushur me ndjesi patriotike dhe tensione sportive, pritet të vendosë shumë për rrugëtimin kuqezi drejt Botërorit 2026.
Në prag të këtij takimi, “Plisat”, tifogrupi i njohur nga Prishtina, kanë dërguar një mesazh të fuqishëm për kuqezinjtë. “Në Leskovcin tonë, në tokën e Shqipërisë, na bëni krenarë, për nder të historisë”, shkruajnë ata në një pankartë që është bërë virale në rrjetet sociale.
Mesazhi bart një simbolikë të thellë, pasi Leskovaci, rreth 100 kilometra larg Prishtinës, është një vend i ngarkuar me kujtime të dhimbshme për shqiptarët, i njohur për masakrat e kryera nga forcat serbe ndaj popullsisë shqiptare. Pikërisht për këtë arsye, përballja e 11 tetorit ka një peshë që shkon përtej futbollit.
Tifozët nga Kosova e kanë quajtur këtë ndeshje një “betejë për dinjitet”, duke u zotuar për mbështetje totale ndaj Kombëtares Shqiptare, pavarësisht se ndeshja zhvillohet jashtë territorit shqiptar. Ata i kanë bërë thirrje lojtarëve që të luajnë me shpirt dhe të nderojnë flamurin kuqezi.
Ndërkohë, në futbollin kosovar, skuadra e Prishtinës ka marrë një fitore të rëndësishme ndaj Ballkanit me rezultatin 1-0, duke konsoliduar vendin e parë në renditje.
Me zemrën e bashkuar dhe shpresën për një triumf historik, tifozët shqiptarë nga të gjitha trojet presin me padurim ditën kur Kombëtarja do të zbresë në fushën e Leskovacit për të mbrojtur ngjyrat e Shqipërisë.
