Një organizatë kriminale e dënuar me vendim të formës së prerë në Itali për trafikimin e qindra kilogramëve drogë, arriti të fitojë pafajësinë në Shqipëri për akuzën e pastrimit të parave, për shkak të mungesës në dosje të vendimit penal italian.

Në vitin 2018, një bankë shqiptare bllokoi një transfertë prej 250 mijë eurosh drejt Holandës nga llogaria e Ylli Seferit. Gjashtë ditë më pas, pothuajse e njëjta shumë u tërhoq cash. Këto lëvizje u bënë pjesë e një hetimi për pastrim parash, që përfshinte Seferin, bashkëshorten dhe djalin e tij.

Ndërkohë, në Itali, Seferi u arrestua në kuadër të operacionit “Rexton” dhe u dënua përfundimisht me 11 vjet e 10 muaj burg për trafik narkotikësh. Vendimi u la në fuqi nga Gjykata e Kasacionit në vitin 2021.

Në Shqipëri, Gjykata e Shkallës së Parë në Tiranë i dënoi në mungesë Seferin dhe familjarët me nga 5 vite burg për pastrim parash. Por në nëntor 2025, Gjykata e Apelit e përmbysi vendimin, duke arsyetuar se mungonte prova e “veprës penale bazë”, pasi në dosje nuk ishte administruar vendimi penal i formës së prerë nga Italia.

Megjithëse vendimi italian ekzistonte dhe ishte publik, ai nuk ishte përfshirë në fashikullin shqiptar. Kjo mungesë u bë vendimtare për shpalljen e pafajësisë.

Prokurori i shkallës së parë, Bledar Valikaj, deklaroi se provat ishin të mjaftueshme dhe se fakti i dënimit për trafik droge përbënte bazë të qartë për hetimin pasuror. Ndërsa prokurori i Apelit, Genti Xholi, pranoi se Apeli gjykon mbi aktet e dosjes dhe se mangësitë në hetim ndikuan në rezultat.

Rasti ka nxjerrë në pah boshllëqe serioze në koordinimin ndërkombëtar dhe në administrimin e provave, duke bërë që një organizatë e dënuar në Itali të dalë e pafajshme në Shqipëri për pastrim parash.