Taylor Swift zbuloi arsyen e vërtetë pse nuk do të performojë në gjysmën e Super Bowl, duke treguar se përkushtimi ndaj Travis Kelce e bën të pamundur të ndajë emocionin mes dashurisë dhe skenës.
Këngëtarja e famshme amerikane, Taylor Swift, ishte e ftuara speciale në emisionin “The Tonight Show” me Jimmy Fallon më 6 tetor. Gjatë bisedës, ajo sqaroi disa thashetheme rreth karrierës dhe jetës së saj personale, përfshirë edhe arsyen pse ka refuzuar të performojë në spektaklin më të madh të futbollit amerikan.
Swift mohoi menjëherë zërat se kishte refuzuar për shkak të pamjeve të performancës, duke sqaruar se gjithçka lidhet me faktin që ajo është e përfshirë emocionalisht në sportin ku luan partneri i saj, Travis Kelce. “Jam e dashuruar me një burrë që luan në atë fushë,” tha ajo, duke e cilësuar futbollin amerikan si “shah i dhunshëm” dhe “luftëtarë pa shpata.”
Ajo pranoi se ndjek çdo ndeshje me ankth, dhe nuk mund të imagjinojë veten të përgatisë koreografi ndërsa Kelce rrezikon çdo javë në fushë. “Është e pamundur të mendoj për skenën kur e di që ai po jep gjithçka për sportin,” u shpreh këngëtarja, duke theksuar se Travis do të donte që ajo ta pranonte ofertën, por ajo “është shumë e përqendruar te ai.”
Në një moment të ëmbël, Swift foli edhe për dasmën e shoqes së saj, Selena Gomez, duke përgënjeshtruar lajmet se kishte bërë ndonjë batutë lidhur me martesën e saj të afërt. “Selena ishte një mrekulli në ditën e saj. Nuk kam parë asgjë më të bukur,” tha Swift, duke shtuar me humor se shmangu çdo përmendje të fejesës së saj për të mos e vjedhur vëmendjen.
Këngëtarja ndau edhe një kujtim të ngrohtë nga e kaluara me Gomez, duke kujtuar veshjet e tyre “plot ngjyra dhe xhinse të ngushta” nga viti 2008. “Ishte koha e jelekëve të vegjël dhe atleteve Chucks. Flisnim për gjëra që na dukeshin ‘amazeballs’,” tha ajo me të qeshur.
Në fund, Swift rrëfeu me humor se Ed Sheeran mësoi për fejesën e saj vetëm përmes Instagram-it, pasi “nuk ka një telefon që funksionon.” Këngëtarja tregoi se lajmin ua kishte shpërndarë vetëm atyre miqve që kishte kontaktuar muajt e fundit, dhe e pranoi me të qeshur që kishte harruar ta njoftonte mikun e saj të ngushtë.
Ky rikthim në “The Tonight Show” shënon daljen e parë televizive të Taylor Swift që nga viti 2022. Albumi i saj më i ri, The Life of a Showgirl, i publikuar më 3 tetor, theu menjëherë rekordin e Spotify për më shumë dëgjime brenda një dite. Në një postim emocionues, ajo e përshkroi projektin si “një portret të shpirtit tim që më në fund ndjehet i plotë.”
