Deputetja e Partisë Demokratike, Jorida Tabaku, ka reaguar lidhur me rritjen e çmimeve të produkteve të shportës, duke e lidhur situatën me, sipas saj, mungesën e mbështetjes për sektorin e bujqësisë.

Tabaku deklaroi se frutat, perimet dhe produktet bujqësore janë bërë të papërballueshme për një pjesë të qytetarëve, veçanërisht për pensionistët dhe shtresat në nevojë. Sipas saj, rritja e çmimeve po ndikon drejtpërdrejt në kostot e jetesës së familjeve shqiptare.

Deputetja argumentoi se bujqësia, e cila përbën rreth 16% të Prodhimit të Brendshëm Bruto, po përballet me taksa të larta, zhvlerësim të euros dhe mungesë mbështetjeje nga shteti.

Ajo paraqiti edhe të dhëna mbi rritjen e importeve, duke theksuar se në vitin 2021 importoheshin rreth 30 mijë ton zarzavate, ndërsa aktualisht shifra ka arritur në 70 mijë ton. Sipas saj, edhe importi i frutave është rritur nga 60 mijë ton në 100 mijë ton.

Tabaku u shpreh se rritja e varësisë nga importet po zëvendëson prodhimin vendas dhe po shton presionin mbi çmimet në treg. Në përfundim, ajo theksoi se bujqësia ka nevojë për mbështetje për të rritur prodhimin dhe për të garantuar çmime më të përballueshme për qytetarët.