Afera e njohur si “Bankers Petroleum” po merr përmasa edhe më të gjera, pasi Prokuroria e Posaçme ka nisur hetime të thelluara ndaj Drejtorisë së Tatimeve, Doganave dhe zyrtarëve publikë e vendorë që dyshohet se kanë lejuar abuzime për më shumë se njëzet vite.
Sipas burimeve pranë SPAK, hetimet kanë zbuluar një dëm ekonomik prej dhjetëra milionë eurosh, i shkaktuar përmes skemave të dyshuara të mashtrimit me TVSH-në, fshehjes së të ardhurave dhe veprimtarive të tjera fiskale të paligjshme.
Fillimisht, hetimi nisi nga Prokuroria e Fierit, e cila kreu arrestimet e para ndaj ish-zyrtarëve të kompanisë dhe disa individëve të tjerë të përfshirë. Por pas kalimit të dosjes tek SPAK, prokuroret Anita Jella dhe Enkeleida Millonai kanë zgjeruar fokusin duke verifikuar përgjegjësinë e hallkave të administratës tatimore dhe doganore, të cilat dyshohet se kanë mbyllur sytë ndaj abuzimeve për vite me radhë.
Gazetarja Klodiana Lala raporton se hetuesit po analizojnë veprimtarinë e zyrtarëve publikë dhe të zgjedhurve vendorë që dyshohet se kanë favorizuar kompaninë, duke i shkaktuar buxhetit të shtetit humbje të mëdha financiare.
Sipas SPAK, dosja po hetohet për një sërë veprash penale, përfshirë:
- krijimi i skemave mashtruese me tatimin mbi vlerën e shtuar
- fshehja e të ardhurave
- pastrimi i produkteve të veprës penale
- shpërdorimi i detyrës
- moskryerja e detyrave nga organet tatimore
- korrupsion pasiv i zyrtarëve të lartë dhe të zgjedhurve vendorë
- grup i strukturuar kriminal
- kryerja e veprave penale nga organizata kriminale
Hetimi konsiderohet ndër më të mëdhenjtë e viteve të fundit, duke prekur jo vetëm drejtues të lartë të kompanisë, por edhe strukturat shtetërore, të cilat dyshohet se kanë kontribuar në krijimin dhe mbrojtjen e skemave abuzuese.
