Prokuroria e Posaçme ka bërë publik njoftimin zyrtar mbi operacionin e përbashkët me autoritetet italiane, i cili çoi në goditjen e disa prej grupeve kriminale shqiptare të trafikut të drogës. Në kuadër të këtij operacioni janë ekzekutuar 24 masa sigurie, ndërsa nga verifikimet rezulton se gjashtë prej personave të hetuar ndodhen në Shqipëri, tre prej të cilëve janë ndaluar.
Sipas autoriteteve italiane, janë sekuestruar mbi 1.300 kilogramë kokainë, që dyshohet se ishte ruajtur dhe magazinuar në gjashtë baza logjistike të ngritura nga grupi kriminal në territorin italian. Në këto ambiente, të dyshuarit vijonin shpërndarjen e drogës dhe mbledhjen e të ardhurave “cash”, të cilat më pas dërgoheshin te drejtuesit e grupit përmes të ashtuquajturve “money mules”, ku përfshiheshin edhe shoferë autobusësh të linjës Itali–Shqipëri.
Gjatë hetimit, autoritetet italiane kanë arrestuar në flagrancë 10 persona të grupit dhe kanë sekuestruar më shumë se 550,000 euro, 10 automjete, një pistoletë gjysmëautomatike dhe 130 kilogramë lëndë narkotike. Sasia totale e sekuestruar do të kishte një vlerë rreth 12 milionë euro po të dilte në treg.
SPAK njofton se provat e mbledhura tregojnë se oficeri i Antiterrorit, Igli Haxhiaj, në kohën kur shërbente në Forcën e Posaçme Operacionale, ka zbuluar të dhëna të klasifikuara të hetimit për persona të dyshuar, duke shkelur sekretin hetimor. Ai akuzohet gjithashtu se ka kërkuar përfitime financiare në këmbim të informacionit të klasifikuar dhe ka kryer veprime të tjera në kundërshtim me detyrën.
Hetimet janë zhvilluar në kuadër të një Skuadre të Përbashkët Hetimore me Prokurorinë Antimafia në Brescia dhe Prokurorinë Federale të Zvicrës, duke dokumentuar aktivitetin e një grupi kriminal të strukturuar, i cili trafikonte lëndë narkotike nga Amerika e Jugut drejt Europës dhe Italisë.
