Prokuroria e Tiranës ka përfunduar hetimet dhe ka dërguar për gjykim 38 shqiptarë dhe një shtetas izraelit, të akuzuar për krijimin e një skeme mashtrimi përmes platformave fiktive “CFD-Tradingplattform” dhe “FX-Leader”.
Hetimet trevjeçare zbuluan një dëm financiar që kap vlerën mbi 2 milionë euro.
Sipas Prokurorisë, skema kriminale operonte nga një call center me emrin “Capital SHPK 1001” në Tiranë. Vetëm në një rast, 254,990 euro u transferuan në llogari të lidhura me platformën “fx-leader.com”. Mashtruesit bindnin viktimat të investonin përmes reklamave në internet dhe rrjeteve sociale, duke i joshur me premtime për fitime të mëdha nga investimet në aksione dhe kriptovaluta.
Viktimat regjistroheshin në platformë duke dhënë të dhënat personale, pas së cilës kontaktoheshin nga operatorë të cilët krijonin një “lidhje besimi”. Fillimisht, viktimat bindeshin të investonin shuma të vogla, duke parë fitime të stimuluara virtualisht. Këto fitime i shtynin të investonin shuma më të mëdha. Por kur përpiqeshin të tërhiqnin paratë, sistemi ndërpriste komunikimin dhe mbyllte platformat.
Hetimet treguan se e gjithë veprimtaria kriminale ishte ndërtuar për të përvetësuar pasuritë e viktimave në mënyrë të paligjshme. Llogaritë online dhe platformat si “PayPal”, “Coinbase”, dhe “Binance” ishin përdorur për menaxhimin e transfertave financiare nëpërmjet kriptovalutave, duke ndërlikuar ndjekjen e parave.
Gjithashtu, autoritetet sekuestruan dokumente dhe skedarë në format Excel, që përmbanin të dhëna të detajuara mbi viktimat, si emrat, numrat e telefonit dhe adresat e email-it, të cilat përdoreshin për t’i kontaktuar dhe mashtruar.
Kjo skemë drejtohej nga një shtetas izraelit, R.G., i cili bashkëpunonte me një grup punonjësish shqiptarë. Për të thelluar hetimet, janë dërguar 12 letra porosi në disa vende europiane. Një prej tyre, nga Republika Çeke, evidentoi raste të viktimave të cilët kishin humbur shuma të konsiderueshme parash pas investimeve në bitcoin, përmes udhëzimeve të ndërmjetësve të platformës.
Një shembull konkret përfshinte një shtetas çek, i cili, pas investimit të 285,000 koronave çeke (rreth 12,000 euro), humbi çdo komunikim me ndërmjetësit dhe nuk mundi të tërhiqte paratë. Skema u ndihmua nga transferta fiktive përmes bankave në vende si Lituania, India, Singapori, Hungaria dhe Malta, të njohura si pika të rrezikut për pastrimin e parave.
Për këto akuza, shtetasi izraelit dhe 38 shqiptarët do të përballen me drejtësinë për veprën penale të “Mashtrim kompjuterik” dhe “Pastrimi i produkteve të veprës penale ose veprimtarisë kriminale”, sipas nenit 143/b-2 dhe nenit 287 të Kodit Penal.
Skema e zbuluar hedh dritë mbi sfidat e sigurisë kibernetike dhe mashtrimet financiare që godasin viktima të pafajshme përmes platformave online, duke nxitur nevojën për masa më të rrepta mbrojtjeje dhe ndërgjegjësimi publik.
