Ngjarja e rëndë e ndodhur në rrethin e Çolës në Vlorë, ku një drejtues mjeti goditi dhe kundërshtoi me dhunë efektivin e Policisë, ka hapur debat dhe reagime të shumta. Ndërkohë, deklarata zyrtare e Policisë është një shembull klasik i asaj që qytetarët prej vitesh e quajnë “arsyetimi i gatshëm”, që vjen menjëherë pas çdo incidenti problematik.
Sipas njoftimit të disseminuar nga Policia e Vlorës, gjithçka nisi nga konstatimi i një shkeljeje të Kodit Rrugor në zonën e Çolës. Punonjësi i Qarkullimit Rrugor identifikoi drejtuesin e mjetit, shtetasin L. Sh., 45 vjeç, i cili fillimisht ka kundërshtuar me fjalë dhe më pas ka kaluar në veprime të dhunshme ndaj efektivit.
Në momentin e shoqërimit, gjatë kontrollit, policia deklaron se gjeti dhe sekuestroi një sasi lënde narkotike të dyshuar kanabis, si edhe një mjet prerës (thikë). Kaq ka mjaftuar që ngjarja të marrë përmasa të tjera.
Policia sqaron se pas procedurave të plota është nisur ndjekja penale ndaj shtetasit L. Sh. për një “paketë” veprash të rënda penale:
– Kundërshtim i punonjësit të policisë,
– Prodhim dhe shitje narkotikësh,
– Prodhim, mbajtja, blerja apo shitja pa leje e armëve të ftohta.
Në të gjithë njoftimin zyrtar, bie në sy gjuha standarde e përdorur sa herë ka episode të ngjashme: një shkelje e vogël trafiku përshkallëzohet në konflikt fizik, pastaj “çuditërisht” gjenden drogë dhe thikë. Ndërsa qytetarët, të cilët shpesh filmojnë e raportojnë raste të abuzimit të autoritetit, vazhdojnë të pyesin:
Pse çdo incident i tensionuar në Vlorë përfundon me të njëjtin skenar?
Dhe përse Policia nuk bën publike pamjet që gjithmonë ekzistojnë në zonat urbane?
Ngjarja e Çolës, edhe pse e mbyllur zyrtarisht me një njoftim rutinë, kërkon transparencë më të thellë. Deri atëherë, qytetarët mbeten me dyshimin e zakonshëm: sa prej versionit zyrtar është e vërtetë dhe sa është thjesht “justifikim” i radhës?
