Sektori i Krimit Ekonomik dhe Financiar, në bashkëpunim me Prokurorinë e Korçës, ka përfunduar një hetim që zgjati 18 muaj dhe ka finalizuar operacionin policor të koduar Green Code, i cili zbuloi mashtrime në skemën kombëtare të mbështetjes për fermerët.
Si rezultat i hetimit janë pezulluar nga detyra gjashtë veterinerë të Drejtorisë së Bujqësisë në Pogradec dhe dy inspektorë të Agjencisë për Zhvillimin e Bujqësisë dhe Ruralit. Një inspektor tjetër i këtij institucioni është shpallur në kërkim.
Kjo ngjarje vjen në vazhdën e akuzave të bëra më herët për shpërdorim të fondeve të ardhura nga Bashkimi Europian.
Hetimet treguan se punonjësit në fjalë, duke bashkëpunuar me njëri tjetrin, kanë falsifikuar aktet e verifikimit dhe të kontrollit në fermat përfituese. Në këtë mënyrë ata dyshohet se kanë përfituar në mënyrë korruptive shuma që varionin nga dhjetë mijë deri në pesëdhjetë mijë lekë, duke shkaktuar dëme të konsiderueshme financiare për buxhetin e shtetit.
