Kryesia e Sindikatës së Fermerëve të Bashkuar ka mbajtur një mbledhje të rëndësishme për të riorganizuar strukturat drejtuese të saj dhe për të përcaktuar aksionet e ardhshme në mbrojtje të interesave të fermerëve.
Me fokus të veçantë tek përfaqësimi i fermerëve dhe mbështetja e tyre, sindikata ka angazhuar një grup të përfaqësuesve që do të marrin pjesë në bisedimet e nevojshme me ministritë përkatëse, për të diskutuar dhe trajtuar çështjet më të rëndësishme për këtë kategori, raporton nga Lushnja gazetarja e TV Apollon Mukades Dervishi.
Në këtë mbledhje, e cila u mbajt me pjesëmarrjen e anëtarëve nga Berati, Kuçova, Fieri, Divjaka dhe Lushnja, u zgjodhën përfaqësuesit që do të angazhohen në bisedime dhe do të përfaqësojnë interesat e fermerëve. Po ashtu, u zgjodh edhe sekretari dhe nënkryetari i sindikatës, ndërsa për zgjedhjen e kryetarit, sipas statutit, është parashikuar të mblidhet një asamble e fermerëve në qershor të këtij viti.
Nënkryetari i zgjedhur i Sindikatës, Ardit Bali, deklaroi se organet drejtuese të sindikatës do të përcaktojnë aksionet dhe veprimet që do të ndërmerren në mbrojtje të interesave të fermerëve. Ai theksoi se sindikata do të vazhdojë të angazhohet në kërkesat dhe nevojat e fermerëve, duke kërkuar më shumë mbështetje dhe përkushtim nga autoritetet përkatëse.
Ndërkohë, ish-kryetari i Sindikatës, Eduard Sharka, dha dorëheqjen nga posti i tij për shkak të angazhimit të tij në politikë. Megjithatë, ai u shpreh i angazhuar për të mbajtur rolin e tij si zëri i fermerëve në politikë dhe për të vazhduar të mbështesë interesat e kësaj kategorie në çdo mundësi.
Me këtë riorganizim dhe angazhim të rinj, Sindikata e Fermerëve të Bashkuar po përpiqet të forcojë rolin e saj dhe të ofrojë një mbështetje më të madhe për fermerët, duke kërkuar që të drejtat e tyre të trajtohen me seriozitet dhe respekt nga institucionet përkatëse.
