Koordinatorja e departamenteve në Partinë Demokratike, Silvi Bardhi, i ka kërkuar llogari qeverisë për një seri ngjarjesh kriminale që kanë tronditur Tiranën dhe Shqipërinë në javët e fundit. Në një deklaratë për mediat, Bardhi ka komentuar vrasjen e 28-vjeçarit, Klajdi Prendi, duke e cilësuar këtë krim si “tipik mafioz”, që i shtohet një jave të përgjakur për kryeqytetin shqiptar.
Bardhi ka theksuar se këto vrasje janë bërë të zakonshme në Shqipëri, duke përmendur rastet e 14-vjeçarit të vrarë pranë shkollës Fan Noli dhe një biznesmeni të vdekur gjithashtu me vrasje gjatë javës së kaluar. Ajo ka kritikuar ashpër reagimin e Policisë, e cila, sipas saj, ofron vetëm komunikata dhe informacione të pjesshme pa arritur të kapë autorët. “Vrasjet po bëhen një skenar i zakonshëm për Tiranën, dhe për këtë nuk ka një përgjigje të efektshme nga organet e rendit,” tha Bardhi.
Kritikat e Bardhit për qeverinë u bënë edhe më të ashpra kur ajo lidh vrasjet me një klimë të pasigurisë dhe kompromentimit të Policisë. Ajo theksoi se këto ngjarje tragjike nuk janë thjesht rastësi, por pasojë e bashkëqeverisjes së politikës me krimin. “Krimi ka marrë timonin, duke i lënë Ramës tepsinë,” u shpreh ajo, duke akuzuar qeverinë e Edi Ramës dhe ministrin e Brendshëm, Ervin Hoxha, për dështimin në luftën kundër kriminalitetit.
Bardhi u shpreh gjithashtu se është koha për një ndryshim të thellë në sistemin e rendit dhe sigurisë. Ajo bëri thirrje për një “Memorandum të Rendit, Sigurisë dhe Jetës”, i cili do të bëhet pjesë e programit të Partisë Demokratike për zgjedhjet e ardhshme. “Kthimi i sigurisë dhe rendit publik brenda 100 ditëve të para të qeverisjes është një premtim që do të realizohet, ashtu siç u realizua në vitin 2005 nga Qeveria Berisha,” theksoi Bardhi.
Në vijim të deklaratës së saj, Bardhi kërkoi krijimin e një Komisioni Parlamentar të Së Vërtetës, duke theksuar se krimi dhe korrupsioni në Shqipëri nuk janë pasojë e natyrës së njerëzve, por e një sistemi politik që ka bashkëpunuar me bandat. Ajo e akuzoi qeverinë e Rilindjes se ka siguruar mbështetje për bandat kriminale, duke u dhënë atyre leje të veprojnë pa frikë. “Bandat e mendojnë veten si një parti bashkëqeverisëse, e cila drejton Shqipërinë me ndihmën e qeverisë së Edi Ramës,” tha Bardhi.
Në fund, Bardhi është shprehur skeptike për mundësinë që ministri Ervin Hoxha të japë dorëheqjen. “T’i kërkosh dorëheqje një ministri si Ervin Hoxha është një punë e kotë. Kjo, sepse dorëheqjet i japin ata që kanë ndërgjegje, jo vartësit e narkobanditëve,” tha Bardhi, duke nënvizuar se qeveria ka dështuar të sigurojë rend dhe siguri për qytetarët.
