Për ndeshjen Shqipëri-Serbi më 7 qershor, në Tiranë angazhohen rreth 2000 forca të sigurisë, instalohet teknologji moderne survejimi dhe ndërmerren masa ekstreme për të garantuar rendin dhe sigurinë publike.
Tirana është kthyer në një qytet të blinduar për ndeshjen e shumëpritur mes Shqipërisë dhe Serbisë, që do të luhet më 7 qershor. Policia e Shtetit ka organizuar një nga operacionet më të mëdha të sigurisë, me rreth 2000 efektivë të përfshirë, përfshirë forcat elitare RENEA, FNSH, njësinë Antiterror dhe Shërbimin Informativ të Shtetit (SHISH).
Siguria më e lartë do të zbatohet ndaj përfaqësueses serbe, e cila do të shoqërohet nga momenti i mbërritjes në Tiranë deri në largim, nën masa të rrepta mbrojtjeje dhe nën mbikëqyrje të vazhdueshme. Reparti special RENEA do të ketë rolin kryesor në shoqërimin dhe sigurinë e ekipit serb, ndërsa Antiterrori do të kontrollojë çdo detaj të perimetrit të stadiumit dhe hyrjet kryesore.
Autoritetet kanë ngritur një plan të detajuar kontrolli, i cili përfshin verifikimin e imtësishëm të biletave dhe dokumenteve të tifozëve, si dhe bllokimin e të gjitha rrugëve që të çojnë drejt stadiumit “Arena Kombëtare”. Përveç kësaj, zona përreth do të jetë e rrethuar nga pajisje antidron për të parandaluar çdo tentativë ndërhyrjeje të jashtme.
Teknologjia më moderne e survejimit është vendosur në stadium, ku janë instaluar kamera me njohje fytyre dhe pajisje të tjera të avancuara që monitorojnë lëvizjet në tribuna dhe ambientet përreth në kohë reale. Federata Shqiptare e Futbollit ka bashkëpunuar ngushtë me të gjitha agjencitë shtetërore për implementimin e këtyre masave të sigurisë.
Për çdo rrezik të mundshëm ajror, janë vendosur pushkë anti-dron dhe do të ketë ndërhyrje edhe nga ajri nëse situata e kërkon. Në çdo pikë kufitare të Shqipërisë, autoritetet kanë shpërndarë listat me fotot e personave me prirje ekstremiste, të cilët nuk do të lejohen të hyjnë në territorin shqiptar.
Pjesëmarrja e lartë e forcave të rendit dhe antiterrorit, monitorimi nga ajri dhe përdorimi i teknologjisë së fundit kanë kthyer këtë ndeshje në një precedent të ri për sigurinë publike në vend. Policia apelon për bashkëpunim dhe mirëkuptim nga qytetarët, në mënyrë që eventi të zhvillohet pa asnjë incident.
Në këtë sfidë jo vetëm sportive, por edhe sigurie, Shqipëria demonstron aftësinë për të menaxhuar ngjarje me rëndësi të lartë ndërkombëtare, duke garantuar rendin, qetësinë dhe imazhin e saj përpara gjithë Europës.
