Në portin e Vigos në Spanjë është goditur një tjetër rast trafikimi droge, ku një shqiptar dhe një biznesmen nga Valencia, së bashku me dy persona të tjerë, janë arrestuar gjatë koordinimit të një dërgese narkotikësh. Sasia e kapur arrinte në 500 kilogramë dhe, sipas të dhënave, ishte e menaxhuar nga një kompani me seli në Valencia, e kontrolluar nga shtetasi shqiptar i ndaluar.
Operacioni është zhvilluar nga Ekipi Kundër Krimit të Organizuar dhe Drogës i Gardës Civile të Pontevedrës, në bashkëpunim me Policinë Kombëtare dhe Shërbimin e Mbikëqyrjes Doganore. Hetuesit dyshuan për praninë e drogës në kontejner, por ajo nuk ishte e dukshme pranë ngarkesës dhe as nuk ishte fshehur në sistemet e ftohjes, një metodë e përdorur shpesh nga rrjetet e trafikut.
Për të gjetur vendin e fshehjes, oficerëve iu desh të ngrinin strukturën metalike të dyshemesë së kontejnerit. Brenda saj u zbuluan pakot e drogës, të vendosura dhe të maskuara në mënyrë të përsosur, me peshë totale rreth gjysmë ton. Pas konfirmimit të dërgesës, u kryen arrestimet.
Porti i Vigos është i njohur për trafikun e lëndëve narkotike nga Amerika e Jugut dhe kohët e fundit ka pasur një rritje të ndjeshme të kapjeve. Ndër rastet më të bujshme është ai i fundvitit 2024, kur autoritetet spanjolle sekuestruan 7,500 kilogramë kokainë të fshehur brenda filetove të tonit të ngrirë, ngarkesë që mbërriti po në këtë port dhe u kap në një depo në Cambre, A Coruña.
