Qeveria po përgatit një skemë të ngjashme me Kroacinë për garantimin e punësimit të përhershëm sezonal dhe mbajtjen e stafit të kualifikuar.
Strategjia e re kombëtare e turizmit, e miratuar së fundmi, vendos një qasje më të strukturuar për të rritur stabilitetin e forcës punëtore në këtë sektor. Qeveria synon të aplikojë modelin kroat të punonjësve të përhershëm sezonalë, duke e përshtatur me realitetin ekonomik e ligjor të Shqipërisë. Qëllimi është ruajtja e stafit të kualifikuar gjatë gjithë vitit dhe garantimi i të ardhurave edhe në periudhat jashtë sezonit.
Dokumenti thekson se hapi i parë do të jetë krijimi i një kuadri të qartë ligjor, që do të përcaktojë rregullat e administrimit të kësaj skeme. Punonjësit sezonalë do të përfitojnë kompensim financiar kur nuk janë aktivë, ndërsa punëdhënësit do të nxitohen të mbajnë stafin për sezonet e ardhshme.
Skema parashikohet të mbulojë jo vetëm punonjësit në turizëm e hoteleri, por edhe sektorë të tjerë që kanë cikël pune sezonal. Kjo do të sigurojë një bazë të qëndrueshme punonjësish për bizneset që përballen me ulje të aktivitetit jashtë pikut të sezonit.
Në strategji janë përcaktuar elementët kyç të nismës, si identifikimi i grupeve të përfituesve, përcaktimi i periudhës minimale të punës pa ndërprerje (p.sh., gjashtë muaj), dhe klasifikimi i bizneseve që kualifikohen për subvencione. Po ashtu, do të vendoset kohëzgjatja maksimale e mbështetjes financiare, që mund të jetë deri në gjashtë muaj pas sezonit.
Qeveria planifikon të mbulojë kostot e sigurimeve shëndetësore pas përfundimit të sezonit, ndërsa ndihma ekonomike për punonjësit do të llogaritet mbi bazën e përfitimeve të papunësisë dhe një përqindje të pagës mesatare. Në këmbim, punëdhënësit do të detyrohen të ripunësojnë stafin e përhershëm sezonal në sezonin pasues dhe të ruajnë numrin e punonjësve të deklaruar në momentin e aplikimit.
Kjo nismë shihet si një hap i rëndësishëm drejt profesionalizimit dhe qëndrueshmërisë së sektorit të turizmit, duke reduktuar fluksin e largimeve dhe duke rritur cilësinë e shërbimeve që ofron Shqipëria në tregun ndërkombëtar.
