Vitin e kaluar, gati 13 mijë të huaj u pajisën me leje pune në Shqipëri, shumica nga Turqia, Egjipti, Filipinet dhe vende të tjera aziatike.
Shqipëria po tërheq gjithnjë e më shumë punonjës të huaj, kryesisht për të plotësuar mungesat në tregun vendas të punës. Të dhënat nga Agjencia Kombëtare e Punësimit dhe Aftësive tregojnë se gjatë vitit të shkuar, gati 13 mijë shtetas të huaj morën leje pune, një shifër dukshëm më e lartë krahasuar me vitet paraardhëse.
Sipas ekspertes së tregut të punës, Ergesta Stërmasi, pjesa më e madhe e të punësuarve të huaj angazhohen në sektorin e turizmit, ndërsa rritja e numrit lidhet edhe me frikën e bizneseve nga kontrollet, duke i shtyrë të deklarojnë punonjësit.
Punonjësit e huaj vijnë kryesisht nga Turqia, Egjipti, Filipinet, India, Kina dhe Ukraina. Megjithatë, Stërmasi e cilëson këtë si një zgjidhje afatshkurtër, duke theksuar nevojën që vëmendja të përqendrohet tek fuqizimi i të rinjve shqiptarë për të shmangur varësinë nga importi i punës.
Kostoja për të sjellë një punonjës të huaj në Shqipëri mund të arrijë deri në 3,500 euro, duke përfshirë shpenzimet e transportit, procedurat ligjore dhe akomodimin. Këto shifra paraqesin një barrë të konsiderueshme për bizneset, sidomos ato sezonale.
Paralelisht, është rritur edhe kërkesa për leje qëndrimi nga të huajt që duan të jetojnë në Shqipëri, jo domosdoshmërisht për punë. Sipas Ministrisë së Brendshme, gjatë vitit të kaluar u regjistruan 13,176 kërkesa për leje qëndrimi, nga 12 mijë që ishin në vitin 2023.
