Të dhënat e FAO tregojnë se Shqipëria ka nivelin më të lartë të nën-ushqyerjes në Europë, duke u renditur pranë Ukrainës, një vend prej vitesh në luftë.
Raporti i fundit i Programit të Kombeve të Bashkuara për Ushqimin (FAO) për periudhën 2022–2024 e vendos Shqipërinë si të vetmin shtet në Europë ku nën-ushqyerja mbetet problem serioz. Ndërsa shumica e vendeve të kontinentit kanë arritur ta eliminojnë këtë fenomen, vendi ynë shfaqet me shifra shqetësuese.
Sipas FAO, rreth 5.4% e popullsisë shqiptare nuk siguron dot ushqim të mjaftueshëm. Krahasuar me vendet e Bashkimit Europian, ku ky tregues është nën 2% ose i papërfillshëm, diferenca është e theksuar. Në fqinjët tanë, si Maqedonia e Veriut, Mali i Zi dhe Greqia, nën-ushqyerja pothuajse nuk ekziston në statistika.
Të dhënat tregojnë se ky problem nuk është i ri. Nga viti 2014 deri në 2019, prevalenca e nën-ushqyerjes në Shqipëri ka qëndruar rreth 4.3–4.5%, duke mos shënuar përmirësime të dukshme. Por pas vitit 2019, fenomeni ka marrë trajektore rritëse.
Në periudhën 2020–2021, niveli arriti në 5.4%, më pas u rrit në 5.8% në vitet 2021–2022 dhe shënoi një rekord 6.2% në 2021–2023. Vetëm kohët e fundit është regjistruar një rënie e lehtë, duke u kthyer në nivelin 5.4% për periudhën 2022–2024.
FAO paralajmëron se Shqipëria jo vetëm që nuk ka bërë progres të mjaftueshëm, por po rrezikon të thellojë diferencën me pjesën tjetër të Europës. Ndërsa vendet e tjera e kanë çuar nën-ushqyerjen drejt zhdukjes, Shqipëria mbetet një pikë e errët në një kontinent që shihet si model i sigurisë ushqimore.
Ky kontrast ngre shqetësime për politikat sociale, ekonomike dhe bujqësore të vendit, duke sinjalizuar nevojën për masa urgjente për të garantuar aksesin e qytetarëve në ushqim të mjaftueshëm dhe cilësor.
