Çmimet e shërbimeve turistike po e largojnë Kosovën nga bregdeti shqiptar dhe rrezikohet një rënie e ndjeshme e pushuesve gjatë verës.
Shqipëria, dikur destinacioni më i preferuar i qytetarëve të Kosovës për pushimet verore, po përballet me një ulje të ndjeshme të interesimit gjatë dy viteve të fundit. Sipas të dhënave të INSTAT-it, hyrjet e shtetasve nga Kosova, kanë rënë ndjeshëm. Vetëm gjatë pesë muajve të parë të këtij viti, numri i vizitorëve të huaj u ul me 7%, ndërkohë që hyrjet nga Kosova mbetën thuajse në të njëjtin nivel si viti i kaluar, ndonëse më parë kishte një rritje të qëndrueshme dyshifrore.
Baki Hoti, kryetar i Unionit të Turizmit të Kosovës, thekson se një nga faktorët kryesorë që ka ndikuar në këtë ndryshim është liberalizimi i vizave për shqiptarët e Kosovës, i cili i ka hapur rrugë lëvizjes drejt vendeve të tjera europiane. “Një pjesë e konsiderueshme e qytetarëve të Kosovës tani zgjedhin destinacione të tjera jashtë rajonit, duke ndikuar në uljen e vizitorëve për Shqipërinë, Malin e Zi dhe Turqinë,” shpjegon ai.
Përveç ndryshimeve në lëvizjen e vizitorëve, Hoti vë në dukje se çmimet në Shqipëri po rriten në mënyrë të konsiderueshme dhe kjo po krijon pasiguri te turistët nga Kosova. “Kjo rritje e çmimeve ka krijuar konfuzion te vizitorët dhe po i bën ata të hezitojnë për të zgjedhur Shqipërinë si destinacion,” thekson ai.
Shoqatat e turizmit në Kosovë paralajmërojnë se nëse ky trend vazhdon, Shqipëria do të humbasë gradualisht një pjesë të madhe të tregut të turistëve nga Kosova. Ky fenomen do të ndikojë drejtpërdrejt në rënien e të ardhurave nga sektori i turizmit dhe do të dobësojë konkurrencën e vendit në rajon.
Situata vjen në një kohë kur destinacionet e tjera rajonale po ofrojnë oferta më të volitshme dhe infrastrukturë më të mirë për turistët. Shqetësimi kryesor mbetet se Shqipëria po e “vret” vetë turizmin e saj përmes politikave të çmimeve që largojnë pushuesit tradicionalë.
Duke marrë parasysh rëndësinë ekonomike të turizmit për vendin, ekspertët rekomandojnë një rishikim të strategjive të çmimeve dhe përmirësimin e shërbimeve për të rifituar besimin e turistëve nga Kosova dhe jo vetëm. Ndryshe, rënia në numrin e vizitorëve mund të jetë një trend që do të vazhdojë dhe do të ketë pasoja afatgjata për industrinë turistike shqiptare.
