Shqipëria feston sot 113-vjetorin e shpalljes së Pavarësisë, një nga momentet kyçe të historisë kombëtare. 28 Nëntori, i njohur si Dita e Flamurit, përkujton aktin historik të shpalljes së pavarësisë në Vlorë nga Ismail Qemali.
Pas shpalljes, Kryetari i Qeverisë së Përkohshme njoftoi gjashtë Fuqitë e Mëdha të kohës—Anglinë, Italinë, Austro-Hungarinë, Francën, Gjermaninë dhe Rusinë—si edhe shtetet ballkanike, përfshirë Rumaninë, Malin e Zi, Serbinë, Bullgarinë, Greqinë dhe Turqinë, duke kërkuar njohjen e pavarësisë si vullnet i qartë i popullit shqiptar.
Më 28 Nëntor 1912, Ismail Qemali u shpall kryetar i Kuvendit dhe drejtues i qeverisë së parë shqiptare. Pavarësia u shpall në emër të të gjitha trojeve shqiptare, ndërsa qeveria u formua nga përfaqësues të krahinave të ndryshme.
Ky akt historik ishte rezultat i përpjekjeve të gjata të shqiptarëve për të mbrojtur territorin dhe për të ngritur një shtet të pavarur. Me vendimin e Kuvendit të Vlorës përfundoi sundimi pesëshekullor osman dhe u vendosën themelet për zhvillimin politik, ekonomik dhe kulturor të vendit.
Shpallja e Pavarësisë konsiderohet gjithashtu një fitore ndaj planeve të monarkive ballkanike që synonin ndarjen e Shqipërisë.
Në këtë ditë të veçantë kuqezi, shqiptarëve u uruar festa e Pavarësisë.
