Shqipëria dhe Belgjika kanë aktivizuar një sistem të përbashkët elektronik për menaxhimin në kohë reale të rasteve të emigracionit të paligjshëm, duke shënuar një hap të ri në bashkëpunimin dypalësh institucional.

Platforma digjitale synon koordinimin e proceseve të rikthimit dhe trajtimin e rasteve të emigrantëve që kanë lëvizur në mënyrë të paligjshme, përmes një shkëmbimi të strukturuar të të dhënave mes autoriteteve të dy vendeve.

Sistemi i ri përfaqëson një nivel të avancuar të bashkëpunimit teknik dhe administrativ, duke e pozicionuar Shqipërinë ndër vendet e para në Europë që zbaton një mekanizëm të integruar elektronik për menaxhimin e proceseve të rikthimit.

Sipas informacionit zyrtar, përfitimet kryesore të platformës përfshijnë përshpejtimin e procedurave, uljen e barrës administrative, rritjen e transparencës, standardizimin e proceseve dhe përmirësimin e koordinimit institucional.

Sistemi funksionon në kohë reale dhe synon të rrisë efikasitetin në trajtimin e emigracionit të paligjshëm, në përputhje me praktikat europiane të menaxhimit të migracionit.