Ministria për Evropën dhe Punët e Jashtme (MEPJ) ka thirrur sot në një takim urgjent ambasadorin e Rusisë në Shqipëri, Alexey Zaitsev.
Takimi vjen pas sulmeve ajrore të ndodhura mëngjesin e sotëm në Kiev, të cilat kanë shkaktuar dëme materiale në ambasadën shqiptare në Ukrainë dhe kanë vënë në rrezik jetën e personelit diplomatik.
MEPJ ka shpërndarë disa pamje në platformën X, ku shfaqen dëmet në ambientet e ambasadës shqiptare. Në reagimin e saj, Ministria ka theksuar se ky incident ka cenuar rëndë sigurinë e diplomatëve, duke e cilësuar atë si një sulm të rëndë ndaj themeleve të diplomacisë ndërkombëtare.
“Një seri sulmesh ajrore nga Federata Ruse tronditi Kievin të premten në mëngjes, duke shkaktuar dëme të mëdha në disa zona të kryeqytetit ukrainas. Si pasojë e këtyre sulmeve u dëmtua pjesërisht Ambasada e Republikës së Shqipërisë në Kiev, si dhe ambasadat e pesë vendeve të tjera, duke vënë në rrezik jetën e personelit diplomatik. Raportohet vetëm për dëme materiale”, thuhet në deklaratën e shpërndarë nga Ministria.
Sulmet ajrore, që janë dënuar gjerësisht nga komuniteti ndërkombëtar, kanë shënjestruar jo vetëm infrastrukturën civile, por edhe ndërtesat diplomatike. Përveç ambasadës shqiptare, janë raportuar dëme edhe në përfaqësitë diplomatike të pesë vendeve të tjera, një fakt që thekson gravitetin e sulmeve dhe rrezikun që ato përfaqësojnë për sigurinë ndërkombëtare.
Ministria ka dënuar ashpër këto sulme, duke i quajtur brutale dhe të pakuptimta. Në reagimin e saj, MEPJ ka nënvizuar se mbrojtja e personelit diplomatik dhe paprekshmëria e misioneve diplomatike janë parime themelore që duhen respektuar pa kushte.
“Ky akt i pakuptimtë është një sulm mbi themelet e diplomacisë ndërkombëtare. Mbrojtja e personelit diplomatik dhe paprekshmëria e misioneve janë parime të panegociueshme që duhen respektuar dhe zbatuar plotësisht,” ka deklaruar Ministria.
Ambasadori rus është thirrur për të dhënë shpjegime mbi këtë incident, ndërsa Shqipëria, në linjë me partnerët e saj ndërkombëtarë, ka kërkuar një reagim të qartë dhe masa për të garantuar sigurinë e misioneve diplomatike në Kiev.
Ky incident vjen në një moment kur tensionet mes Rusisë dhe Ukrainës vazhdojnë të jenë të larta, dhe sulme të tilla vetëm sa përkeqësojnë situatën. Shqipëria, si pjesë e familjes evropiane, ka shprehur solidaritetin e saj me popullin ukrainas dhe ka dënuar veprimet e Rusisë që shkelin normat ndërkombëtare.
Në një kohë kur mbrojtja e vlerave diplomatike është thelbësore, sulmet e tilla ngrejnë shqetësime serioze mbi sigurinë dhe paprekshmërinë e përfaqësive diplomatike në zonat e konfliktit. Shqipëria ka ripërsëritur angazhimin e saj për të punuar me partnerët ndërkombëtarë për të mbrojtur këto vlera dhe për të garantuar drejtësi për këto sulme të papranueshme.
