Më 12 mars 2025, një vendim i dyshimtë u miratua nga qeveria shqiptare, me firmën e zëvendëskryeministres Belinda Balluku, i cili kalon pronësinë e godinave të ish-Uzinës së Autotraktorëve, në zonën e Shkozës, te shoqëria shtetërore KAYO. Ky akt vjen pas një vendimi të qeverisë për revokimin e të drejtës së pronësisë që kishte kaluar më parë tek Bashkia e Tiranës, e cila kishte planifikuar ndërtimin e banesave sociale në këtë vend. Tashmë, pa miratimin e Këshillit Bashkiak, këto prona kalojnë nën juridiksionin e Ministrisë së Mbrojtjes, ku pritet të ndërtohet një fabrikë për prodhimin e armëve dhe municioneve.
Ky veprim është bërë pa pëlqimin dhe pa miratimin e Këshillit Bashkiak të Tiranës, një akt që bie në shkelje të rregullave të qeverisjes vendore. Sipas ligjit për qeverisjen vendore, çështjet të tilla duhet të miratohen me jo më pak se 3/5 e votave të anëtarëve të këshillit, por ky vendim nuk është diskutuar në mbledhje, duke shkaktuar një thyerje të rëndë të procedurave ligjore.
Kalimi i pronësisë është kritikuar ashpër, pasi shkel ligjin për pasuritë shtetërore, duke krijuar një precedent të rrezikshëm për trajtimin e pronave publike në të ardhmen. Përveç kësaj, ndërtimi i një fabrike armësh dhe municionesh në një zonë të banuar, me densitet të lartë popullsie, ka ngritur alarmin për rrezikun që ky projekt mund të sjellë për jetën e qytetarëve. Shkollat, kopshte, dhe biznese që operojnë në këtë zonë janë të ekspozuara ndaj mundësisë së ndonjë aksidenti të mundshëm, duke kujtuar tragjedinë e “Gërdecit”.
Për realizimin e projektit është miratuar një buxhet fillestar prej 3 milionë eurosh, ndërsa shoqëria KAYO do të ketë mundësinë të bashkëpunojë me biznese private për prodhimin e armëve dhe municioneve. Ky element ka shtuar dyshimet për mungesë transparence dhe për qëllimet e vërteta pas këtij projekti. Kjo përfshirje e bizneseve private nënvizon dyshimet për manipulim të mundshëm dhe mungesë kontrolli nga ana e shtetit.
Për qytetarët e Shkozës dhe zonave përreth, ky vendim është një shqetësim i madh, pasi ndërtimi i një fabrike armësh pranë zonave të banuara mund të rrezikojë jetën dhe sigurinë e tyre. Kjo është një shkelje flagrante e të drejtave të qytetarëve dhe një goditje tjetër për transparencën dhe përgjegjshmërinë e administratës qeveritare. Nëse ky vendim zbatohet, do të kemi një tjetër shembull të dhunimit të ligjit dhe të interesave të qytetarëve, të cilët janë injoruar nga ata që duhet të mbrojnë sigurinë publike.
