Tifozët shqiptarë mund të sigurojnë që nga sot biletat për ndeshjen Andorra – Shqipëri, e vlefshme për eliminatoret e Kupës së Botës 2026, që luhet më 13 nëntor.
Federata Shqiptare e Futbollit ka njoftuar nisjen e shitjes së biletave për sfidën Andorra – Shqipëri, e cila do të zhvillohet më 13 nëntor 2025, në orën 20:45, në stadiumin “FAF” të Andorrës. Takimi është pjesë e eliminatoreve të Botërorit 2026, dhe pritet të tërheqë një numër të madh tifozësh shqiptarë.
Sipas njoftimit të Departamentit të Komunikimit në FSHF, biletat janë vënë në shitje online që prej ditës së sotme, të premte, 7 nëntor 2025. Të gjithë tifozët që dëshirojnë të udhëtojnë dhe të mbështesin Kombëtaren kuqezi mund t’i blejnë biletat përmes faqes zyrtare të FSHF-së në seksionin e dedikuar për këtë ndeshje.
Për të lehtësuar procesin, FSHF bën të ditur se një ditë para ndeshjes, më 12 nëntor, të gjitha biletat e blera online do të dërgohen me e-mail te personat që kanë kryer blerjen. Kjo shmang radhët dhe procedurat e gjata në ditën e takimit.
Federata rikujton se hyrja në stadium do të bëhet vetëm kundrejt paraqitjes së një mjeti identifikimi të vlefshëm. Tifozët këshillohen të jenë të përgatitur dhe të shmangin mbajtjen me vete të objekteve të ndaluara, pasi kontrollet do të jenë rigoroze në pikat e hyrjes.
Kjo ndeshje konsiderohet e rëndësishme për rrugëtimin e Shqipërisë drejt kualifikimit në Kupën e Botës 2026, dhe pritet që mbështetja nga tribuna të luajë rol kyç në moralin e ekipit.
Tifozët janë të ftuar të sigurojnë sa më shpejt biletat e tyre, ndërsa Kombëtarja vazhdon përgatitjet me synim marrjen e rezultatit maksimal në transfertë.
