Një dramë që përshkruan 15 ditë të tensionuara nën regjimin diktatorial, me një kast të gjerë aktorësh dhe regji të Driada Dervishit, mbërriti në teatrin “Bylis” të Fierit për të sjellë një përvojë të rrallë emocionale dhe historike për publikun fierak.
Mbrëmjen e kaluar (e enjte), skena e teatrit “Bylis” në Fier u gjallërua nga shfaqja “15 ditë prilli”, një prodhim teatror që mbushi sallën me emocion, reflektim dhe art të pastër skenik. E regjisuar nga Driada Dervishi dhe bazuar në romanin me të njëjtin titull të autores Anisa Markarian, vepra solli në skenë 12 aktorë të cilët interpretonin me mjeshtëri nga tre deri në pesë role secili, duke sjellë një dimension të gjerë dramatik dhe artistik.
Nga një roman prej 400 faqesh, është përpunuar një dramatizim i ngjeshur prej një orë e 40 minutash, që trajton një periudhë dyjavore nën hijen e festimeve të ditëlindjes së një ish-diktatori. E vendosur në një realitet të zymtë dhe absurd, shfaqja rrëfen mbijetesën psikologjike dhe fizike të individëve përballë një regjimi represiv, ku personazhet lëvizin vazhdimisht mes kujtimeve dhe realitetit.
Regjisorja Driada Dervishi, në një prononcim për mediat, theksoi sfidat kreative dhe angazhimin e trupës aktoriale në përcjelljen e mesazhit thelbësor të veprës. Ajo nënvizoi rëndësinë që ka teatri në sjelljen e të kaluarës së afërt për të reflektuar mbi të tashmen dhe për të edukuar brezat e rinj me të vërtetat historike.
Në qendër të shfaqjes ishte personazhi Vilsoni, i interpretuar nga aktori Romir Zalla, i cili solli në skenë një karakter të thellë dhe simbolik. Përmes lojës së tij të fortë emocionale, Zalla transmetoi dramën e një njeriu të kapluar nga absurdi dhe hipokrizia e një regjimi që i mohon individit lirinë dhe të drejtën për të jetuar ndershmërisht.
Krahas tij, aktorë si Mimoza Marjanaku, Adelina Muça, Alesia Xhemalaj, Amos Zaharia dhe Yllka Mujo ndanë përvojat e tyre në këtë shfaqje. Ata e përshkruan si një sfidë artistike dhe shpirtërore, e cila i afroi më shumë me historinë personale të brezit të prindërve dhe gjyshërve të tyre.
Në skenën e teatrit “Bylis” interpretuan gjithashtu edhe emra të tjerë të njohur si Hervin Çuli, Suela Bako, Xhuliano Brisku, Aleksandër Seitaj, Sanie Hoti dhe Jaho Guma. Shfaqja u shoqërua me muzikën e kompozitores Rona Kastrioti dhe skenografinë e Beqo Nanajt, duke i dhënë publikut fierak një përvojë të veçantë estetike dhe emocionuese pas tre muajsh pauzë që nga premiera në Tiranë.
