Pas thirrjes së zëvendëskryeministres Belinda Balluku në SPAK, Agron Shehaj i kërkon Edi Ramës të marrë përgjegjësi politike dhe të japë dorëheqjen pa vonesë.
Kryetari i Partisë Mundësia, Agron Shehaj, ka reaguar ashpër pas zhvillimeve të fundit në institucionet e drejtësisë, duke iu drejtuar me një thirrje të drejtpërdrejtë kryeministrit Edi Rama për dorëheqje. Shkak u bë thirrja për hetim e zëvendëses së tij, Belinda Balluku, në Prokurorinë e Posaçme Kundër Korrupsionit (SPAK).
Në një video-mesazh të publikuar në rrjetet sociale, Shehaj ironizoi deklaratën e Ramës se “drejtësia ka punën e vet”, duke e cilësuar si shmangie nga përgjegjësia politike që, sipas tij, i takon vetë kreut të qeverisë.
Shehaj rikujtoi se kjo nuk është hera e parë që një zyrtar i lartë i mazhorancës përfshihet në hetime apo akuza për korrupsion. Ai përmendi rastet e Arben Ahmetajt, i cili është në arrati, dhe të Erion Veliajt, që aktualisht ndodhet në paraburgim.
“Si mund të thuash se s’të intereson kur arrestojnë Belinda Ballukun? Është zëvendësja jote direkte. Para saj kërkuan të arrestonin Ahmetajn që iku në Zvicër. Ndërsa Veliaj, krahu yt i djathtë, është tashmë në burg për korrupsion,” u shpreh Shehaj me tone të forta.
Duke iu drejtuar personalisht kryeministrit, ai shtoi: “Sa veta duhet të arrestojnë nga rrethi yt i ngushtë që të marrësh përgjegjësi? Bëhu burrë, mbaj përgjegjësi dhe jep dorëheqjen.”
Mesazhi i Shehajt vjen në një moment kur tensionet mes opozitës dhe qeverisë janë thelluar për shkak të hetimeve që po zhvillohen ndaj disa figurave të rëndësishme të mazhorancës. Ai e cilësoi këtë si një provë të dështimit moral dhe institucional të qeverisë aktuale.
Sipas kreut të Partisë Mundësia, përballja me drejtësinë e zyrtarëve të lartë është një pasojë e natyrshme e sistemit të korruptuar që, sipas tij, është ndërtuar gjatë këtyre viteve nën drejtimin e Ramës.
Shehaj shtoi se dorëheqja e kryeministrit do të ishte një akt përgjegjësie përballë qytetarëve dhe institucioneve të vendit, duke theksuar se vendi nuk mund të ecë përpara me një qeveri që “rrihet nga skandali në skandal”.
Në fund të mesazhit të tij, ai i kërkoi Ramës që të tregojë burrëri politike, të mos fshihet pas drejtësisë dhe të largohet me dinjitet, në vend që të presë që të tjerët t’i marrin vendimet për të.
