Presidenti i Ukrainës Volodymyr Zelensky ka konfirmuar se shefi i tij i stafit Andriy Yermak ka dhënë dorëheqjen, pas një bastisjeje anticorruptive të kryer në banesën e tij në Kiev nga dy agjencitë kryesore të luftës kundër korrupsionit në vend.
Yermak, një figurë me ndikim të madh politik dhe këshilltari më i afërt i Zelenskyt gjatë gjithë luftës së plotë me Rusinë, ka qenë nën presion në rritje për shkak të një skandali që po zgjerohet, ndonëse ai vetë nuk është akuzuar për ndonjë shkelje. Zelensky e kishte emëruar Yermakun së fundmi si drejtues në negociatat e reja për paqen, ku Presidenti amerikan Donald Trump ka marrë një rol kyç.
Në një adresim të ashpër para ndërtesës presidenciale, Zelensky u bëri thirrje qytetarëve për unitet duke paralajmëruar se Ukraina rrezikon të humbasë gjithçka, përfshirë të ardhmen e saj, nëse përçarjet vazhdojnë.
Skandali i korrupsionit ka tronditur Ukrainën prej javësh, ka dobësuar pozitën e presidentit dhe ka vënë në rrezik negociatat me Shtetet e Bashkuara, në një moment tejet të ndjeshëm për sigurinë e vendit.
Sipas agjencive anticorruptive të Ukrainës, kontrolli në banesën e Yermak u krye të premten në mëngjes. Yermak deklaroi se ka bashkëpunuar plotësisht me hetimin.
Zelensky tha gjatë fjalimit se është mirënjohës për rolin e Yermak në negociata dhe se do të nisë konsultimet për zëvendësuesin e tij. Sipas tij, në kohë lufte kërkohet forcë e brendshme dhe vendime të maturuara. Ai paralajmëroi se Rusia kërkon gabime nga ana ukrainase, ndërsa vetë Ukraina nuk mund të lejojë përçarje të brendshme.
Raportimet e fundit nga Ukraina tregojnë se disa zyrtarë të nivelit të lartë janë përfshirë në një skemë dyshuese për përvetësimin e rreth 100 milionë dollarëve në sektorin e energjisë. Hetuesit thonë se skema përfshinte marrjen e ryshfeteve dhe ndikimin në kompanitë shtetërore, përfshirë firmën bërthamore Enerhoatom.
Raportet e korrupsionit janë shfrytëzuar edhe nga zyrtarë rusë që po marrin pjesë në procesin e bisedimeve të iniciuara nga Presidenti Trump, duke shtuar shqetësimet e aleatëve europianë. Ukraina mbetet kandidate për anëtarësim në Bashkimin Europian, mirëpo një raport i fundit ka ngritur dyshime mbi angazhimin e vendit për reforma të thella kundër korrupsionit.
Zelensky kishte tentuar më herët të kufizonte fuqitë e dy agjencive anticorruptive, por u tërhoq menjëherë pas reagimeve të ashpra të publikut dhe aleatëve perëndimorë. Në javët e fundit ai ka shkarkuar ministrin e energjisë dhe ministrin e drejtësisë, ndërsa disa persona të dyshuar janë ndaluar.
Ndërkohë, ndërsa dimri ka nisur në Ukrainë, sulmet e vazhdueshme ruse kanë dëmtuar rëndë infrastrukturën energjetike dhe miliona qytetarë po përballen me furnizime të kufizuara me energji elektrike.
Ndër të tjerët që janë larguar nga vendi pas akuzave është edhe ish partneri i biznesit të Zelenskyt, Timur Mindich, bashkëpronar i studios televizive ku Zelensky filloi karrierën e tij artistike.
Me popullaritetin e Yermak që ka rënë ndjeshëm dhe me thirrjet e shumë deputetëve për largimin e tij, dorëheqja shënon një pikë kthese të rëndësishme në kabinetin e presidentit. Sipas sondazheve të fundit, rreth 70 për qind e publikut ukrainas kërkonin dorëheqjen e tij.
Zelensky dhe Yermak ishin miq prej më shumë se katërmbëdhjetë vitesh dhe u shfaqën bashkë natën e parë të pushtimit rus, duke i thënë vendit se nuk do të largoheshin dhe se do të vijonin rezistencën.
