Shtetet e Bashkuara kanë pezulluar përkohësisht përpunimin e të gjitha kërkesave të emigracionit nga afganët, pas identifikimit të një shtetasi afgan si i dyshuari për sulmin me armë ndaj dy ushtarëve të Gardës Kombëtare pranë Shtëpisë së Bardhë.
Shërbimet e Shtetësisë dhe Imigracionit të SHBA-së njoftuan se vendimi u mor në pritje të një rishikimi të protokolleve të sigurisë dhe verifikimit të aplikantëve.
I dyshuari, që thuhet se ka hyrë në SHBA nga Afganistani në shtator të vitit 2021, plagosi rëndë dy pjesëtarët e Gardës Kombëtare gjatë të shtënave të së mërkurës. Presidenti Donald Trump e cilësoi ngjarjen si “akt terrorist” dhe deklaroi se do të ndërmerren masa për largimin e të huajve “nga çdo vend që nuk i përket këtij vendi”.
Sipas Departamentit të Sigurisë Kombëtare, i dyshuari është identifikuar si Rahmanullah Lakanëal, i përshkruar si “i huaj kriminal nga Afganistani”. Një zyrtar amerikan tha për CBS se Lakanëal kishte aplikuar për azil në vitin 2024 dhe i ishte miratuar në fillim të këtij viti. Ai raportohet se ka hyrë në SHBA në kuadër të programit humanitar “Mirë se vini aleatët”, i krijuar pas tërheqjes së forcave amerikane nga Afganistani në vitin 2021.
Trump deklaroi se Shtetet e Bashkuara “duhet të rishqyrtojnë çdo të huaj që ka hyrë në vend nga Afganistani nën administratën Biden”, duke paralajmëruar masa të reja në politikat e emigracionit.
