Mbi 10 mijë suplemente ushqimore dhe bimore të skaduara janë sekuestruar në një magazinë në Tiranë, në kuadër të operacionit të koduar “Audienca”, të zhvilluar nga Seksioni për Hetimin e Krimeve Ekonomiko-Financiare në bashkëpunim me Prokurorinë e Tiranës.

Sipas policisë, produktet mbaheshin për llogari të një subjekti me aktivitet ndërkombëtar në fushën e reklamimit dixhital. Gjatë kontrollit, u konstatuan suplemente pa pullën e Agjencisë së Barnave, pa pullën e Ministrisë së Financave dhe pa etiketa në gjuhën shqipe.

Në vijim të hetimeve, është shpallur në kërkim administratori i subjektit, shtetasi nga Bosnja dhe Hercegovina, J. T., 53 vjeç. Gjithashtu, janë proceduar penalisht dy punonjës të subjektit, J. G., 30 vjeç dhe M. Ç., 26 vjeç.

Materialet i janë referuar Prokurorisë së Tiranës për veprat penale “Kontrabanda me mallra të tjera”, “Ruajtja apo depozitimi i mallrave kontrabandë”, “Tregtimi dhe transportimi i mallrave që janë kontrabandë”, “Fshehja e të ardhurave” dhe “Importimi, prodhimi, shitja dhe ruajtja e ushqimeve të rrezikshme për shëndetin ose jetën e njerëzve”.