SPAK dhe autoritetet italiane sekuestruan prona me vlerë mbi 4 milionë euro në Verona, të lidhura me trafik droge nga një grup shqiptar
Petrit Çela, babai i Suel Çelës, ka reaguar publikisht pasi SPAK njoftoi sekuestrimin e disa pronave në Itali, me vlerë mbi 4 milionë euro. Ai pretendon se pasuritë janë të ligjshme dhe të ndërtuara me punë të ndershme që nga viti 1990. Sipas tij, posedon tre vendime gjyqësore nga drejtësia italiane që provojnë këtë ligjshmëri.
Petrit Çela shprehu zhgënjimin e tij ndaj mediave, të cilat sipas tij po i “nxijnë jetën” dhe theksoi se do të publikojë dokumentet që mbështesin qëndrimin e tij. Ai shtoi se do ta çojë deri në fund betejën ligjore për të vërtetuar të drejtën e tij.
Ndërkohë, Prokuroria e Posaçme SPAK dhe Prokuroria e Veronës zbuluan një rrjet të organizuar kriminal me bazë në Elbasan dhe aktivitet në Itali, i përfshirë në trafikun ndërkombëtar të kokainës nga Amerika Latine drejt Europës. Në qendër të hetimeve janë Suel dhe Mario Çela, të dyshuar si drejtues të organizatës që ka investuar fitimet kriminale në prona në Verona.
Operacioni i përbashkët mes SPAK, BKH dhe Guardia di Finanza rezultoi në sekuestrimin e disa aseteve, përfshirë një ndërtesë në Nogarole Rocca, një tjetër me 30 njësi zyrash dhe dyqanesh, një llogari bankare me qira vjetore rreth 400 mijë euro dhe një shoqëri ndërtimi me kuota 100% në Itali. Hetimet zbuluan se pasuritë u financuan me të ardhura nga trafiku i drogës.
Paratë, sipas të dhënave zyrtare, qarkullonin përmes një shoqërie shqiptare, pronë e vëllezërve Çela, dhe përdoreshin në Itali për investime në ndërtim dhe rikonstruksione. Njëri prej tyre është në kërkim ndërkombëtar, ndërsa tjetri ndodhet në burg në Belgjikë, i dyshuar për vrasje mafioze në Antëerp.
Gjykata e Shkallës së Parë për Korrupsionin dhe Krimin e Organizuar në Shqipëri ka lëshuar një vendim për këtë të fundit për disa vepra penale, përfshirë vrasje me paramendim, trafik droge dhe pastrim parash. Në Shqipëri janë regjistruar gjithashtu transaksione të dyshimta të pasurive të paluajtshme që synonin të fshihnin origjinën e parave.
Hetimi zbuloi gjithashtu përfshirjen e një çifti shqiptarësh në Verona, që kishin rol kyç në menaxhimin e pasurive të organizatës. Ata rezultonin si bashkëpunëtorë të besuar të vëllezërve dhe ishin pjesë e listës së pagesave të rrjetit. Operacioni thekson rëndësinë e bashkëpunimit ndërkombëtar në çmontimin e grupeve kriminale shqiptare që kërkojnë të investojnë jashtë vendit.
