Brenda tre ditëve janë bllokuar mbi 20 ton mallra të pasigurta, ndërsa Tatimet paralajmërojnë kontrolle më të rrepta ndaj informalitetit
Drejtoria e Përgjithshme e Tatimeve ka intensifikuar aksionin kundër informalitetit dhe pasigurisë ushqimore në tregjet bujqësore dhe blegtorale në vend. Në bashkëpunim me Ministrinë e Bujqësisë, autoritetet kanë sekuestruar mbi 20 ton produkte të dyshimta vetëm gjatë tri ditëve të para të operacionit.
Në një deklaratë zyrtare, institucioni thekson se ky aksion synon rritjen e sigurisë ushqimore dhe mbrojtjen e shëndetit të konsumatorëve shqiptarë. Sipas tatimeve, gjetjet tregojnë se mungesa e formalizimit në tregje është një rrezik i drejtpërdrejtë për jetën dhe mirëqenien e qytetarëve.
“Formalizimi i sektorit bujqësor dhe blegtoral është thelbësor për sigurinë ushqimore dhe mbrojtjen e konsumatorit,” thuhet në njoftimin e shpërndarë nga autoritetet. Ato shtojnë se nuk do të ketë tolerim për ata që abuzojnë me shëndetin publik.
Administrata Tatimore ka apeluar për respektimin e ligjit dhe lëshimin e faturës fiskale në çdo hallkë të zinxhirit ushqimor, nga prodhuesi te tregtari dhe më pas te konsumatori. Kjo praktikë, sipas tyre, garanton gjurmueshmërinë e produkteve dhe mbron konkurrencën e ndershme në treg.
Ky operacion është pjesë e një strategjie më të gjerë për të vendosur standarde më të larta në sektorin e bujqësisë dhe blegtorisë, duke synuar një treg më të pastër dhe më të sigurt për të gjithë qytetarët.
Tatimet paralajmërojnë se aksioni do të vijojë me kontrolle të përditshme, sidomos në pikat me fluks të lartë tregtie dhe në zonat rurale, ku shpesh mungon monitorimi institucional.
Autoritetet bëjnë të ditur se pas përfundimit të këtij aksioni do të publikohen të dhëna më të hollësishme, ndërsa subjektet abuzuese pritet të përballen me masa administrative dhe ndjekje ligjore.
