Udhëheqësit e NATO-s në Hagë riafirmuan mbrojtjen kolektive dhe dënuan kërcënimin e vazhdueshëm nga Rusia dhe terrorizmi global
Në një deklaratë të përbashkët pas Samitit të NATO-s të mbajtur në Hagë, krerët e shteteve dhe qeverive të vendeve anëtare përsëritën angazhimin e tyre të palëkundur ndaj mbrojtjes kolektive sipas Nenit 5 të Traktatit të Uashingtonit, duke theksuar se një sulm ndaj një anëtari është një sulm ndaj gjithë Aleancës.
Deklarata nënvizoi edhe rëndësinë e lidhjes transatlantike dhe të mbrojtjes së vlerave të përbashkëta si demokracia dhe liria. Në të theksohej vendosmëria për të mbrojtur sigurinë e mbi një miliard qytetarëve në hapësirën euroatlantike.
Pjesëmarrësit u shprehën të bashkuar përballë sfidave të shumta që rëndojnë sigurinë ndërkombëtare, veçanërisht ndaj kërcënimit afatgjatë që paraqet Rusia. Në deklaratë përmendet gjithashtu kërcënimi i vazhdueshëm i terrorizmit, duke theksuar domosdoshmërinë e vigjilencës së përbashkët.
Edhe pse Rusia nuk u përmend në mënyrë eksplicite si agresore në pushtimin e Ukrainës, aleatët riafirmuan përkushtimin e tyre për të mbështetur Kievin në mënyrë të pavarur dhe sipas vlerësimeve të secilit vend.
Ndryshe nga Samiti i Uashingtonit i vitit të kaluar, në Hagë nuk pati ndonjë përmendje të qartë për rrugën e anëtarësimit të Ukrainës në NATO. Përjashtimi i termit “rrugë e pakthyeshme” reflekton një ndryshim qasjeje në këtë çështje.
Gjithashtu, këtë herë mungoi angazhimi financiar kolektiv për Ukrainën. Kontributet e pritshme nuk u vendosën si detyrim i përbashkët, por si vendime sovrane të secilit shtet anëtar, duke ndryshuar qasjen e vitit të kaluar që parashikonte 40 miliardë dollarë në vit.
Presidenti amerikan Donald Trump u shpreh shkurtimisht mbi angazhimin e SHBA-së për Nenin 5, duke deklaruar se “ne jemi me ta gjatë gjithë kohës”, një deklaratë që nuk ofron qartësi të plotë, por mban linjën e mbështetjes tradicionale ndaj aleatëve.
