Një investim publik i shpallur me bujë si sukses infrastrukturor ka përfunduar në një skandal të rëndë në fshatin Usojë të Mallakastrës. Rruga e rikonstruktuar vetëm pak muaj më parë është shembur pas reshjeve të fundit të shiut, duke u kthyer në simbolin më të freskët të dështimit në menaxhimin e fondeve publike.

Segmenti rrugor është pjesë e procedurës së prokurimit me numër reference REF-31799-12-04-2024, me objekt “Rikonstruksion i rrugëve në fshatrat Belistan, Usojë dhe Drenovë e Re të njësisë administrative Qendër”. Punimet u realizuan nga kompania “Llazo sh.p.k”, e shpallur fituese nga Bashkia Mallakastër. Projekti u prezantua si një premtim i mbajtur nga kryebashkiaku Qerim Ismailaj, por situata aktuale në terren paraqet një realitet krejt ndryshe.

Reshjet e shiut nxorën në pah atë që banorët kishin dyshuar prej kohësh: punime me cilësi të dobët, mungesë standardesh dhe zbatim të diskutueshëm të projektit. Në hyrje të fshatit, asfalti është çarë pothuajse në të gjithë gjerësinë e rrugës, ndërsa bazamenti ka rrëshqitur dhe ka përfunduar poshtë segmentit, madje në oborrin e një banese private. Dëmet janë të dukshme dhe përbëjnë rrezik real për banorët.

Mungesa e elementëve bazë teknikë është evidente. Nuk janë ndërtuar mure mbajtëse për mbrojtjen nga erozioni, nuk është realizuar drenazhimi i duhur i ujërave dhe mungojnë kanalet kulluese anësore. Shtresa e asfaltit paraqitet e hollë dhe e paqëndrueshme, e paaftë për të përballuar edhe reshje normale, çka ngre pikëpyetje serioze mbi mbikëqyrjen teknike dhe respektimin e specifikimeve të kontratës.

Aktualisht, rruga është e pakalueshme, duke izoluar banorët dhe duke krijuar rrezik për jetën dhe pronën e tyre. Investimi që duhej të përmirësonte qarkullimin është kthyer në barrë dhe kërcënim për komunitetin. Ngjarja ngre dyshime mbi mënyrën e përdorimit të fondeve publike dhe mbi përgjegjësitë institucionale.

A janë respektuar specifikimet teknike të kontratës? A është ushtruar kontrolli i duhur nga autoriteti kontraktor? A do të mbajë dikush përgjegjësi për dëmin e shkaktuar? Në planin ligjor, situata kërkon reagim institucional. Nëse ekzistojnë elementë të shpërdorimit të detyrës apo shkelje në procedurat e prokurimit, organet kompetente duhet të referojnë çështjen për hetim. Kur një investim publik shembet brenda pak muajsh dhe shkakton dëme konkrete e të menjëhershme, përgjegjësia nuk mund të mbetet vetëm morale.

Banorët e Usojës ndihen të zhgënjyer dhe të mashtruar. Ata panë ceremoninë e inaugurimit dhe dëgjuan premtime për zhvillim, por sot shohin asfaltin e rrugës së re të përfunduar në oborrin e një shtëpie. Një imazh që flet më shumë se çdo deklaratë. Ky nuk është thjesht një problem infrastrukture, por një provë e dështimit institucional ndaj qytetarëve. Kur rruga shembet kaq shpejt, pyetja që mbetet është: kush do të mbajë përgjegjësi?