Nga janari në maj 2025, rastet me salmonelë dhe helmim nga ushqimi u shtuan ndjeshëm duke alarmuar sektorin shëndetësor për mungesën e kontrolleve efektive.
Sipas të dhënave zyrtare nga Instituti i Shëndetit Publik, Shqipëria regjistroi një rritje shqetësuese të rasteve me helmim nga ushqimi dhe salmonelë gjatë pesë muajve të parë të vitit 2025. Janari shënoi numrin më të lartë me 112 raste helmimi, ndërsa maji pësoi një tjetër rritje duke arritur 115 raste.
Helmimet ushqimore, të njohura si toksiko-infeksione alimentare, përbëjnë një nga burimet kryesore të sëmundjeve diarrehike, shpesh të lidhura me mungesën e higjienës në përpunimin dhe ruajtjen e ushqimeve. Kjo situatë është më shqetësuese në ambientet e përbashkëta të gatimit, ku kushtet e papërshtatshme favorizojnë përhapjen e infeksioneve.
Rastet e salmonelës, një nga patogjenët më të zakonshëm ushqimorë, u rritën dukshëm nga 3 raste në janar në 31 raste në maj, duke e çuar totalin në 59 raste gjatë periudhës janar-maj. Kjo tregon përkeqësim të kontrollit të sigurisë ushqimore, sidomos në sezonin pranveror kur konsumi i ushqimeve të freskëta rritet.
Në total, gjatë periudhës janar-maj 2025 janë regjistruar 28,268 raste sëmundjesh diarrehike në Shqipëri, ku mbi 98% e tyre janë me etiologji të panjohur. Kjo do të thotë se shkaku i saktë i këtyre sëmundjeve nuk është identifikuar, duke krijuar pasiguri në diagnozë, trajtim dhe masat parandaluese.
Mungesa e testimeve laboratorike dhe mbështetja e diagnostikës vetëm në simptomat klinike të përgjithshme tregon një dobësi serioze të sistemit epidemiologjik. Kjo pamundësi për të identifikuar burimin e sëmundjes e bën më të vështirë ndërhyrjen në kohë për të parandaluar shpërthimet.
Përmirësimi i survejancës epidemiologjike dhe kontrolli më rigoroz i kushteve të higjienës në zinxhirin ushqimor mbeten detyra kryesore për parandalimin e rritjes së mëtejshme të këtyre infeksioneve në vend.
