Drejtori i Departamentit për Kufirin dhe Migracionin në Policinë e Shtetit, Saimir Boshnjaku, ka bërë të ditur se gjatë vitit 2024 janë kapur rreth 2.3 milionë euro të padeklaruara në kufirin shqiptar.
Ky informacion u dha gjatë një tryeze publike me temë “Parandalimi i Pastrimit të Parave dhe Korrupsionit Transnacional”, organizuar nga Komisioni i Posaçëm Antikorrupsion.
Boshnjaku tha se ka pasur një rritje të dukshme të rasteve të kapjes së parave të padeklaruara në kufi gjatë viteve të fundit. Ai shpjegoi se në vitin 2022 ishin kapur rreth 3.6 milionë euro në 32 raste, shumica e të cilave nga individë ose kompani transporti që transportonin para të padeklaruara. Por në vitin 2024, numri i rasteve është rritur në 79, me një total prej 2.8 milionë eurosh.
Gjithashtu, Boshnjaku njoftoi se deri tani, gjatë vitit 2024, janë sekuestruar rreth 2.3 milionë euro në 62 raste të ndryshme. Një nga rastet më të fundit u godit mbrëmë në pikën e kalimit kufitar të Muriqanit, ku u sekuestruan rreth 600 mijë euro që po transportoheshin “cash” (në para të gatshme) pa u deklaruar.
Drejtori i Policisë Kufitare theksoi se ky fenomen ka ardhur si rezultat i rritjes së bashkëpunimit të ngushtë me institucione të tjera kombëtare dhe partnere ndërkombëtare, si autoritetet doganore dhe forcat e rendit britanike dhe italiane. Ky bashkëpunim ka mundësuar një mbikëqyrje më të rreptë të kalimeve kufitare dhe një përgjigje më efikase ndaj tentativave të pastrimit të parave dhe korrupsionit transnacional.
Boshnjaku theksoi gjithashtu se angazhimi i Policisë së Shtetit në luftën kundër pastrimit të parave dhe korrupsionit do të vijojë të mbetet prioritet. Ai nënvizoi rëndësinë e intensifikimit të masave për të parandaluar çdo përpjekje të individëve dhe grupeve të organizuara që përdorin kufirin për të fshehur transaksione financiare të paligjshme.
Ky informacion është pjesë e përpjekjeve të vazhdueshme të Policisë së Shtetit për të siguruar një kontroll më të ngushtë mbi lëvizjen e parave të padeklaruara, duke përmirësuar kështu sigurinë e kufijve dhe integritetin e sistemit financiar të vendit.
