Nga 1 janari 2026, pronarët e garazheve dhe bodrumeve do të paguajnë më shumë për taksën e ndërtesës, me rritje që arrijnë deri në 196%.
Qeveria ka propozuar rritjen e çmimeve të referencës për pasuritë e paluajtshme në rrethe, gjë që do të sjellë automatikisht shtim të detyrimeve të taksës së ndërtesës për apartamentet, njësitë tregtare, garazhet dhe bodrumet e mbyllura. Sipas metodologjisë së miratuar në vitin 2018, përllogaritja e taksës për këto ambiente bëhet mbi bazën e 70% të çmimit të apartamenteve të banimit në zonat kadastrale përkatëse.
Sipas llogaritjeve të bëra, detyrimi i një pronari garazhi të mbyllur me sipërfaqe 50 m2 do të rritet ndjeshëm në disa zona të vendit. Për shembull, në zonën kadastrale nr.13 në Durrës, pranë portit, çmimi i referencës për apartamentet është propozuar të kalojë nga 67,500 lekë/m2 në 200,000 lekë/m2. Kjo rritje 196% do të trefishojë detyrimin e taksës nga 4,725 lekë në vit në 14,000 lekë.
Rritje e madhe pritet edhe në zonën nr.6 të Durrësit, që përkon me bregdetin e Gjirit të Lalëzit. Aty detyrimi për një garazh me të njëjtën sipërfaqe do të kalojë nga 4,725 lekë në 9,800 lekë, ose 107% më shumë se aktualisht.
Situatë e ngjashme pritet edhe në jug të vendit. Në zonën kadastrale nr.1 të Himarës, çmimi i referencës propozohet të kalojë nga 58,000 lekë/m2 në 140,000 lekë/m2. Kjo do ta rrisë taksën vjetore për një garazh 50 m2 nga 4,060 lekë në 9,800 lekë, një rritje prej 141%. Në zonën nr.2 të Himarës, detyrimi vjetor do të shkojë nga 4,060 lekë në 7,000 lekë, ose 72% më shumë.
Ndryshimet e fundit vijnë pas vendimit të vitit 2023 për Tiranën, ku çmimet e referencës u rritën me 5% deri në 76% në 32 zona kadastrale dhe pesë njësi administrative. Në kryeqytet, zona më e shtrenjtë vijon të jetë ajo e ish-Bllokut, ku çmimi i referencës është tashmë 228,400 lekë/m2, ose 20% më i lartë se më parë.
Ekspertët theksojnë se kjo rritje e detyrimeve për garazhet dhe bodrumet në rrethe do të rëndojë ndjeshëm buxhetin e familjeve dhe bizneseve, veçanërisht në zonat ku çmimet e referencës janë shumëfishuar. Zbatimi i vendimit pritet të nisë nga 1 janari 2026.
Ky ndryshim, i cili ndjek logjikën e rritjes së çmimeve të tregut të pasurive të paluajtshme, është parë nga qeveria si një hap drejt harmonizimit fiskal, por nga qytetarët shihet si një barrë shtesë e cila do të vështirësojë edhe më shumë jetesën.
