Udhëtarët përballen me tarifa të larta dhe mungesë transparence për transportin e lëngjeve mbi 100 ml në bagazhet e dorës
Pak ditë pas lehtësimit nga Bashkimi Europian për të transportuar deri në dy litra lëngje në bagazhet e dorës, pasagjerët po përballen me një tjetër sfidë: çmime të larta shtesë për këtë shërbim. Shoqata italiane për mbrojtjen e konsumatorëve, Assoutenti, paralajmëron se mungesa e qartësisë dhe zbatimi jo i njëtrajtshëm i rregullave në aeroporte të ndryshme rrisin koston deri në 130 euro për secilin pasagjer.
Sipas Assoutenti-t, aeroportet europiane nuk kanë një qasje të përbashkët. Disa aeroporte si Milano Malpensa, Linate, Roma Fiumicino, Bologna dhe Torino kanë instaluar skanerë të rinj që kontrollojnë në mënyrë të sigurt lëngjet në shishe mbi 100 ml, por shumë aeroporte të tjera nuk e kanë zbatuar ende rregullin. Për pasagjerët, kjo situatë krijon konfuzion dhe shpesh i detyron të dorëzojnë bagazhet e dorës në momentin e fundit, duke u përballur me tarifa të larta.
Tarifat për transportin e lëngjeve variojnë në mënyrë të konsiderueshme: Ryanair ngarkon nga 35 deri në 75 euro, WizzAir deri në 70 euro, Easyjet rreth 65 euro, ndërsa ITA Airways arrin deri në 130 euro për fluturimet ndërkombëtare.
Presidenti i Assoutenti-t, Gabriele Melluso, e përshkroi situatën si “kaos total” që rëndon ndjeshëm xhepat e pasagjerëve dhe kërkoi nga autoriteti italian i aviacionit civil, ENAC, që të publikojë një listë të përditësuar të aeroporteve që lejojnë transportimin e lëngjeve mbi 100 ml në bagazhet e dorës, për të shmangur surprizat e pakëndshme.
Në mungesë të një standardi të unifikuar në të gjithë Bashkimin Europian, Assoutenti këshillon që udhëtarët të informohen mirë paraprakisht për rregullat që vlejnë në aeroportet e nisjes dhe të mbërritjes. Kjo është thelbësore për të shmangur humbjen e produkteve ose pagesat e papritura, sidomos gjatë periudhës së pushimeve verore.
