Historia e dashurisë mes aktorit Romeo Veshaj dhe ish-finalistes së “Big Brother VIP”, Heidi Baçi, duket se ka përfunduar pa shumë zhurmë, duke hapur rrugën për një kapitull të ri në jetën e aktorit.
Çifti është ndarë që në gusht, dhe Heidi është larguar nga Shqipëria për t’u rikthyer në Itali, duke lënë pas karrierën dhe lidhjen e saj të dështuar.
Ndërsa Heidi ka zgjedhur të qëndrojë larg vëmendjes, Romeo duket se e ka nisur një histori të re dashurie. Miq pranë aktorit kanë konfirmuar se prej fillimit të tetorit, ai është parë shpesh në shoqërinë e një vajze brune, identiteti i së cilës ende mbetet i paqartë. Fillimisht thashetheme, tashmë kjo lidhje po përforcohet gjithnjë e më shumë, me çiftin që është parë bashkë në ambiente publike.
Pavarësisht se ata nuk kanë dalë hapur, burime pranë çiftit tregojnë se vajza e re, e cila nuk është një figurë publike, po e shoqëron Romeon në aktivitete të ndryshme. Çifti është parë së fundmi në zonën e ish-Bllokut, ku vëllai i Romeos, Donald Veshaj, zotëron një biznes. Megjithatë, dyshja ka qëndruar e rezervuar, duke shmangur vëmendjen e tepërt.
Miqtë e Romeos kanë treguar se lidhja e re nisi pak ditë pas përfundimit të marrëdhënies me Heidin, por nuk dihet saktësisht koha e ndarjes mes tyre. Ndërkohë, në fillim të shtatorit, Romeo po shfaqej ende në shoqërinë e Heidit, ndërsa ajo e shoqëronte në disa prej mbrëmjeve të tij live si këngëtar.
Zërat për ndarjen mes tyre u vulosën kur Heidi hoqi të gjitha fotot dhe videot me Romeon nga profili i saj në Instagram. Për më tepër, aktorja nuk u pa ta uronte Romeon publikisht për ditëlindjen e tij, një detaj që nxiti dyshime për një krizë në marrëdhënien e tyre.
Gjithçka u bë më e qartë kur Romeo u shfaq në një dasmë në shoqërinë e Borës dhe Donaldit, ndërsa Heidi mungonte. Kjo mungesë u interpretua nga fansat si një shenjë e qartë që çifti kishte përfunduar lidhjen e tyre.
Sot, Heidi ka zgjedhur të kthehet në Itali, pranë familjes së saj, duke lënë pas periudhën e saj të shkurtër në Shqipëri. Ndërkohë, Romeo vazhdon të tërheqë vëmendjen me lidhjen e tij të re, edhe pse ai dhe partnerja e tij e re po përpiqen të qëndrojnë larg syrit të publikut.
Me këtë ndarje, përfundon një tjetër histori dashurie e njohur në botën e showbizit shqiptar, duke lënë hapësirë për fillimin e një romance të re që pritet të zbulohet plotësisht në të ardhmen.
