Situata në fshatrat e zonës së Tërbufit ka marrë përmasa alarmante pas reshjeve të dendura të ditëve të fundit. Hektarë të tërë tokash bujqësore janë nën ujë, duke rikthyer pamjen e dikurshme të kënetës së Tërbufit – një zonë që për dekada është transformuar në tokë të punueshme me investime dhe mund të pafund të fermerëve.
Shkaku kryesor i kësaj situate është mungesa e theksuar e pastrimit të kanaleve kulluese dhe përcjellëse nga institucionet përgjegjëse. Kanale të mbuluara nga kallamishtet dhe mbeturinat kanë bllokuar rrjedhjen natyrore të ujërave, duke e kthyer të gjithë zonën në një kënetë të pakalueshme. Toka të mbjella me grurë, jonxhë apo perime janë tashmë të zhytura, ndërsa dëmtohen edhe stalla dhe magazina që shërbejnë për bagëtitë.
Në vend që të përballen me zhvillim, fermerët e zonës po përballen me izolim, humbje të prodhimit dhe rrezik për ekzistencën ekonomike të tyre. Ironikisht, zogjtë shtegtarë kanë rikthyer “gjallërinë” në këtë kënetë të re, ndërsa institucionet mjaftohen me “gjallëri” në rrjete sociale, pa marrë masa konkrete në terren.
Fermerët kërkojnë reagim urgjent dhe investime të vazhdueshme në sistemin e kullimit, në mënyrë që një zonë që dikur ishte simbol i transformimit bujqësor të mos kthehet në simbol të neglizhencës shtetërore.
Nga Ndricim Gjoshi .
