Situata e pafavorshme hidrike në vend ka ulur ndjeshëm prodhimin nga hidrocentralet, duke rritur varësinë nga importet dhe rolin e fotovoltaikëve.
Të dhënat e Bilancit të Energjisë për tremujorin e dytë 2025 tregojnë se energjia elektrike në dispozicion u rrit me 2,5%, por prodhimi vendas neto ra me 4,6%, duke u ulur në 1.757 GWh nga 1.841 GWh një vit më parë. Nga kjo sasi, 43,5% u sigurua nga hidrocentralet private dhe koncesionare, 40,1% nga ato publike dhe 16,4% nga prodhues të tjerë, kryesisht fotovoltaikë.
Importet bruto të energjisë arritën në 725 GWh, një rritje prej 16,5% krahasuar me të njëjtën periudhë të 2024-ës, ndërsa eksportet ranë me 4,1%, duke zbritur në 638 GWh. Kjo solli një bilanc negativ prej 88 GWh në shkëmbimin e energjisë.
Prodhimi nga hidrocentralet publike u tkurr me 14,3%, duke zbritur në 704 GWh nga 821 GWh një vit më parë. Edhe privatët dhe koncesionarët patën rënie të ngjashme prej 14,6%, duke prodhuar 765 GWh. Në të kundërt, prodhimi nga burimet e tjera, kryesisht panelet diellore, u rrit me 2,3 herë, duke arritur në 288 GWh.
Humbjet në rrjet shënuan një ulje të lehtë prej 1%, duke rënë nga 323 GWh në 320 GWh. Megjithatë, ato përbëjnë ende 17,3% të totalit të energjisë në dispozicion, një përqindje e lartë për standardet rajonale.
Konsumi i përgjithshëm i energjisë nga përdoruesit u rrit me 3,3%, duke arritur në 1.525 GWh. Konsumatorët familjarë patën një rritje të ndjeshme prej 10,2% në përdorim, ndërsa konsumatorët jo familjarë e ulën konsumin me 3% krahasuar me një vit më parë.
Sipas ekspertëve, rënia e prodhimit nga hidrocentralet dhe rritja e importeve sinjalizojnë nevojën për diversifikim të mëtejshëm të burimeve të energjisë dhe investime të qëndrueshme në sektorin fotovoltaik për të shmangur varësinë nga kushtet klimatike.
