Financimet për kontratat PPP pritet të bien ndjeshëm në vitin 2026, duke reflektuar një zvogëlim të kostove të buxhetit dhe rishikim të prioriteteve publike.
Financimet që shteti parashikon të mbulojë për kontratat koncesionare dhe partneritetet publik-privat pësojnë një ulje të qartë në vitin 2026, krahasuar me vitin 2025. Totali i fondeve për këto projekte zbret nga rreth 13.9 miliardë lekë në rreth 12.08 miliardë lekë, që përfaqëson një tkurrje prej afro 1.85 miliardë lekësh ose rreth 13.3%.
Në sektorin e infrastrukturës dhe energjisë, financimet mbeten kryesisht të qëndrueshme, pa ndryshime të mëdha në projektet ekzistuese. Kontrata për Rrugën e Arbrit ruan vlerën e financimit prej 3.36 miliardë lekësh për vitin 2026, ndërsa fondet për mirëmbajtjen e rrugëve janë parashikuar në 660 milionë lekë, në të njëjtin nivel si më herët.
Ndërkohë, projekti për portin e jahteve në Orikum mbetet i pandryshuar, me një financim prej 860 milionë lekësh. Kjo tregon se disa projekte strategjike vazhdojnë të trajtohen me prioritet të qëndrueshëm.
Ulja prek më së shumti dy kontrata të rëndësishme në fushën e shëndetësisë dhe shërbimeve publike. Programi i check-up-it për popullsinë 35–70 vjeç ulet nga 876 milionë lekë në 699.8 milionë lekë, ndërsa pagesat për shërbimin e doganave ulen lehtë nga 1.52 miliardë lekë në 1.5 miliardë lekë.
Rënia më e thellë regjistrohet te projekti i sterilizimit të instrumenteve kirurgjikalë dhe dezinfektimit, i cili zbritet nga 1.9 miliardë lekë në vetëm 500 milionë lekë për vitin 2026. Ndërsa koncesioni për shërbimet laboratorike në pesë spitale rajonale arrin në 2 miliardë lekë, nga 1.9 miliardë lekë këtë vit.
Në nivel vendor, Bashkia e Tiranës sheh gjithashtu ulje të lehta në financimet për projektet e saj. Investimet për ndërtimin e shkollave zbresin nga 707.5 milionë lekë në 685.2 milionë lekë, ndërsa programet për eficiencën e energjisë pësojnë gjithashtu rënie të moderuar, duke reflektuar rishikim të prioriteteve buxhetore lokale.
