Rasti i 14 vjeçares shqiptare në Menidi të Greqisë ka marrë një zhvillim të ri. Të premten në mëngjes adoleshentja u paraqit në stacionin e policisë duke mbajtur një gazetë, brenda së cilës pretendoi se ndodhej fetusi që kishte abortuar pas goditjeve të nënës së saj.
Policia shkoi menjëherë në Aspropyrgos dhe arrestoi nënën e vajzës për lëndime trupore dhe dhunë në familje. Sipas të dhënave të deritanishme, ekspertiza mjekoligjore e kryer mbi të miturën nuk ka konstatuar asnjë shenjë dhune, në kundërshtim me deklarimet e saj fillestare.
Ndërkohë nuk është verifikuar ende nëse objekti i mbështjellë në gazetë ishte vërtet një fetus. Hetimet vijojnë.
Familja e adoleshentes ka mohuar kategorikisht se ka pasur ndonjë konflikt mes nënës dhe vajzës. Vëllai i saj deklaroi se para tre muajsh 14 vjeçarja ishte larguar nga shtëpia duke thënë se do të blinte një sanduiç dhe nuk ishte kthyer më. Sipas tij familja nuk kishte dijeni që ajo ishte shtatzënë. Ai tha se kur nëna shkoi ta takonte vajzën, tre persona u shfaqën para saj dhe më pas situata përfundoi me shoqërimin e nënës në komisariat.
Babai i vajzës tha se familja kishte kërkuar për ditë të tëra ndihmën e policisë për të gjetur të bijën dhe mohoi të gjitha pretendimet për dhunë. Ai kërkoi që vajza të ekzaminohet nga një mjek për të përcaktuar nëse është goditur dhe nëse ka pasur ndonjë shkak tjetër për pretendimet e saj.
Ai shprehu dyshim se vajza ka qenë shtatzënë dhe theksoi se familja nuk ka patur asnjë kontakt me të prej muajsh, ndërsa e quajti të pashpjegueshme deklaratën e saj.
Autoritetet greke po vijojnë hetimet për të zbardhur ngjarjen, përfshirë statusin e shtatzënisë së vajzës, rrethanat e deklaruara dhe origjinën e objektit të mbështjellë në gazetë.
