Kryeministri Edi Rama është takuar në Bruksel me Presidentin e Këshillit Europian, António Costa, në kuadër të angazhimeve të tij zyrtare me institucionet e Bashkimit Europian.

Takimi është zhvilluar përpara një darke pune dhe është shoqëruar me publikimin e disa fotografive nga ana e kreut të qeverisë. Rama e ka cilësuar António Costa-n si një mik të çmuar.

Sipas informacionit të bërë publik, biseda është përqendruar te procesi i negociatave për anëtarësimin e Shqipërisë në Bashkimin Europian, përfshirë ecurinë e reformave dhe bashkëpunimin institucional mes Shqipërisë dhe BE-së.

Takimi vjen në një fazë të rëndësishme të procesit integrues, ndërsa Shqipëria vijon angazhimet për përmbushjen e kushteve të kërkuara nga Bashkimi Europian.