Kryeministri Edi Rama ka theksuar se Shqipëria mban një qëndrim të qartë kundër antisemitizmit dhe vijon të ruajë marrëdhënie të shkëlqyera me Izraelin, të bazuara në miqësinë historike mes dy popujve.

Në fjalën e tij, Rama vuri në dukje se trashëgimia historike e Shqipërisë në mbrojtjen e hebrenjve gjatë Holokaustit e bën lidhjen mes dy vendeve thellësisht të veçantë. Ai theksoi se qeveria shqiptare është e përkushtuar për ta ruajtur dhe kremtuar këtë trashëgimi, duke mbajtur një qëndrim të vendosur kundër antisemitizmit në çdo formë.

Kryeministri u ndal edhe te reagimi i shoqërisë shqiptare gjatë konfliktit në Gaza, duke theksuar se, pavarësisht se shumica e popullsisë është myslimane, shqiptarët u bashkuan me dhimbjen e popullit palestinez pa shprehur urrejtje ndaj Izraelit apo qytetarëve hebrenj.

Ai theksoi se në Shqipëri nuk u organizuan protesta urrejtjeje dhe se vizitorët hebrenj nuk u përballën me armiqësi, ndryshe nga ajo që ndodhi në disa vende të tjera të Evropës, ku antisemitizmi u shfaq në mënyrë shqetësuese.

Rama deklaroi se Shqipëria refuzon qartësisht çdo formë urrejtjeje apo diskriminimi dhe se qëndron kundër antisemitizmit po aq sa kundër islamofobisë, duke e konsideruar këtë qasje si pjesë thelbësore të marrëdhënieve me popujt dhe shtetet e tjera.