Pas një mbledhjeje maratonë të Grupit Parlamentar të Partisë Socialiste, kryeministri Edi Rama ka prezantuar 7 ndryshime në kabinetin qeveritar.

Në pritje të zbardhjes së vendimit të Gjykatës Kushtetuese për Belinda Ballukun, e cila la në fuqi pezullimin e saj nga detyra, Rama ka vendosur ta largojë nga postet e zëvendëskryeministres dhe ministres së Infrastrukturës dhe Energjitikës.

Në vend të saj si numri dy i Qeverisë është emëruar Albana Koçiu, e cila largohet nga drejtimi i Ministrisë së Brendshme.

Postin e ministrit të Brendshëm e merr Besfort Lamallari, i cili largohet nga Ministria e Drejtësisë. Detyrën e ministrit të Drejtësisë e merr Toni Gogu.

Ministria e Infrastrukturës dhe Energjitikës i është besuar Enea Karakaçit.

Ndërkohë, Erjona Ismaili është emëruar ministre për Marrëdhëniet me Parlamentin, duke zëvendësuar Toni Gogun në këtë funksion.

Nga kabineti largohen Elisa Spiropali si ministre e Jashtme dhe Pirro Vengu si ministër i Mbrojtjes.

Si ministër i Jashtëm është emëruar ish-ambasadori i Shqipërisë në BE, Ferit Hoxha, ndërsa si ministër i Mbrojtjes është emëruar Ermal Nufi.