Në një intervistë për podcastin East Side Stories të medias austriake Die Presse kryeministri Edi Rama ka folur për procesin e anëtarësimit në Bashkimin Europian, luftën kundër korrupsionit, debatet politike në Shtetet e Bashkuara dhe projektin e Jared Kushner në ishullin e Sazanit.
Duke u ndalur te Struktura e Posaçme kundër Korrupsionit dhe Krimit të Organizuar Rama theksoi se edhe pse SPAK mund të bëjë gabime pavarësia e tij nuk duhet prekur. Ai theksoi rëndësinë e mekanizmave të drejtësisë që duhet të hetojnë dhe të veprojnë pa marrë parasysh se nga cila anë vjen një çështje duke e pranuar se ky proces mund të jetë i dhimbshëm dhe i vështirë por i domosdoshëm për ndërtimin e një sistemi të besueshëm.
Në vijim Rama u shpreh optimist për angazhimin e Shqipërisë për anëtarësim në BE brenda vitit 2030 duke theksuar se mbështetja e Komisionit Europian është e qartë. Ai theksoi se qëllimi nuk është thjesht të plotësohen detyra formale por të ndryshohet vetë vendi duke e bërë më demokratik dhe më europian.
Kryeministri u pyet edhe për projektin e Jared Kushner në Shqipëri si edhe për përplasjet politike mes figurave si Trump dhe Soros. Rama tha se investimi në Sazan erdhi natyrshëm pas vizitave të investitorëve të interesuar dhe se marrëdhënia është e karakterit afatgjatë dhe jo politik. Ai shtoi se Shqipëria është vend mikpritës për të gjithë miqtë e saj dhe se nuk është roli i tij të ndërhyjë në raportet mes individëve.
Sa i përket Rusisë Rama kujtoi se marrëdhëniet mes dy vendeve janë ndërprerë që në vitin 1960. Ai theksoi se Shqipëria nuk ka pasur vizita të nivelit të lartë në Rusi dhe as nuk është vizituar nga ndonjë drejtues i saj duke shtuar se kjo mungesë marrëdhëniesh nuk përbën ndonjë shqetësim.
Kryeministri e mbylli intervistën duke nënvizuar orientimin e qartë euroatlantik të Shqipërisë dhe rëndësinë e forcimit të institucioneve demokratike në vend.
